लन्डन – बुल्गेरियन पप गायिका दाराले यो वर्षको चर्चित गायन प्रतियोगिता ‘युरोभिजन सङ कन्टेस्ट’ को उपाधि जितेकी छन्। उनको चर्चित डान्स ट्र्याक ‘बाङ्गारङ्गा’ले बुल्गेरियालाई इतिहासमै पहिलो पटक युरोभिजनको उपाधि दिलाएको हो।

२७ वर्षीया दाराले दर्शक र निर्णायक दुवैको मतमा उत्कृष्ट प्रदर्शन गर्दै कुल ५१६ अंकसहित शीर्ष स्थान हासिल गरिन्। निकै प्रतिस्पर्धात्मक बनेको अन्तिम नतिजामा उनले दोस्रो स्थानको इजरायल र तेस्रो स्थानको रोमानियालाई पछि पारेकी हुन्।

प्रतियोगिताको सुरुवातमा दारालाई उपाधिको बलियो दाबेदार मानिएको थिएन। तर, उनको उत्कृष्ट नृत्य निर्देशन र मन छुने गीतको लयले सबैलाई मन्त्रमुग्ध बनाउँदै उपाधि चुम्न सफल भयो। बुल्गेरियाले युरोभिजनको इतिहासमा उपाधि जितेको यो पहिलो पटक हो।

यता, प्रतियोगितामा बेलायतको खराब प्रदर्शनले यो वर्ष पनि निरन्तरता पाएको छ। बेलायतको प्रतिनिधित्व गरेका संगीतकार ‘लुक मम नो कम्प्युटर’ को गीत ‘आइनस, ज्वाई, ड्राई’ मात्र १ अंक पाउँदै प्रतियोगिताको सबैभन्दा पुछारमा रह्यो।

उनले स्टेजमा केही फरक र अनौठो प्रस्तुति दिए पनि दर्शकको मन जित्न सकेनन्। आफ्नो प्रस्तुतिलाई लिएर उनले यसअघि नै आशंका व्यक्त गरेका थिए। सिन्थ–पप विधाको आफ्नो गीतलाई धेरैले कि त अत्यधिक मन पराउने वा मनै नपराउने स्वभावको रहेको उनले बताएका थिए।

नतिजापछि प्रतिक्रिया दिँदै उनले भने, “मैले पहिले नै धेरै आशा नगर्न भनेको थिएँ। आशा राखिएन भने हार्दा पनि दुःख फिक्का हुन्छ।”

प्रत्यक्ष प्रसारणका क्रममा टिप्पणीकार ग्राहम नोर्टनले बेलायती प्रतिनिधिले आफ्नो तर्फबाट उत्कृष्ट प्रयास गरे पनि युरोपेली दर्शकमाझ त्यो जादू चल्न नसकेको टिप्पणी गरे।