एजेन्सी– पश्चिमी अस्ट्रेलियामा शनिबार सेतो शार्कको आक्रमणमा परी एक जनाको मृत्यु भएको छ । प्रहरीलाई उद्धृत गर्दै एएफपीले जनाएको अनुसार पर्थ सहर नजिकको रोटनेस्ट टापु आसपासको समुद्री क्षेत्रमा बिहान करिब १० बजे शार्कले आक्रमण गरेको हो ।

अष्ट्रेलियाली प्रहरीले पीडितको उद्धार सम्भव नभएको जनाएको छ । घटनापछि स्थानीय प्रशासनले उक्त पर्यटकीय समुद्री क्षेत्रमा जाने मानिसलाई पानीमा प्रवेश गर्दा ‘अतिरिक्त सावधानी’ अपनाउन आग्रह गरेको छ ।

सन् १७९१ यता अस्ट्रेलियामा करिब एक हजार ३०० शार्क आक्रमणका घटना रेकर्ड भएका छन् । ती घटनामध्ये २६० भन्दा बढी व्यक्तिको मृत्यु भएको तथ्यांकमा उल्लेख छ ।

यसअघि गत जनवरीमा सिड्नी हार्बर क्षेत्रमा भएको शार्क आक्रमणमा पनि एक जनाको ज्यान गएको थियो । पछिल्लो घटनासँगै दुई दिनको अवधिमा चार वटा शार्क आक्रमणका घटना सार्वजनिक भएका छन् । त्यसपछि समुद्री तटीय क्षेत्रका दर्जनौँ पर्यटकीय स्थलमा उच्च सतर्कता अपनाइएको छ भने केही समुद्री क्षेत्र अस्थायी रूपमा बन्द गरिएको अधिकारीहरूले बताएका छन् ।

हालैका वर्षहरूमा अस्ट्रेलियामा शार्कसँग सम्बन्धित घटनामा मृत्यु हुने क्रम बढ्दै गएको छ । वैज्ञानिकहरूका अनुसार समुद्री तापक्रम वृद्धि, भीडभाडयुक्त तटीय क्षेत्र र समुद्री वातावरणमा आएको परिवर्तनका कारण शार्कको व्यवहार प्रभावित भइरहेको छ, जसले आक्रमणका घटना बढ्न सक्ने संकेत देखिएको छ ।