काठमाडौं – नेपाली कांग्रेस संसदीय दलका नेता भीष्मराज आङदेम्बे ले सरकारको नीति तथा कार्यक्रममा समेटिन नसकेका प्रविधिसम्बन्धी विषयलाई आगामी बजेटमार्फत सम्बोधन गर्नुपर्ने बताएका छन् ।

शनिबार काठमाडौंमा नेपाल मोबाइल व्यवसायी महासंघ को महाधिवेशन उद्‌घाटन कार्यक्रममा बोल्दै आङदेम्बेले नीति तथा कार्यक्रममा प्रविधि क्षेत्रका धेरै महत्वपूर्ण विषय छुटेको उल्लेख गरे। उनले ती विषयलाई बजेटमार्फत समेटेर सम्बोधन गर्नुपर्नेमा जोड दिए ।

उनले नीति तथा कार्यक्रममाथिको छलफललाई केही घण्टामै सीमित गरिएकोप्रति असन्तुष्टि व्यक्त गर्दै यसअघि तीन दिनसम्म हुने छलफल छोट्याएर सरकारले आवश्यक संसदीय प्रक्रिया पूरा नगरेको आरोप लगाए। यद्यपि प्रि–बजेट छलफलमा भने पर्याप्त समय दिएर व्यापक बहस हुने विश्वास उनले व्यक्त गरे।

आङदेम्बेले विगतमा जस्तो विरोधका लागि मात्रै विरोध गर्ने प्रतिपक्षको शैली अब नदोहोरिने बताउँदै परिणाममुखी काममा प्रतिपक्षले सरकारलाई साथ दिने धारणा राखे। तर सरकारका पछिल्ला गतिविधि हेर्दा अपेक्षित परिणाम दिने दिशामा स्पष्ट तयारी देखिन नसकेको उनको भनाइ थियो ।

उनले सकारात्मक सोचका साथ सरकारका राम्रा कामलाई समर्थन गर्ने र कमजोरी तथा त्रुटिमा सचेत गराउने भूमिकामा प्रतिपक्ष प्रस्तुत भएको पनि बताए।