काठमाडौं-खाद्य प्रविधि तथा गुण नियन्त्रण विभागले पोखरा औद्योगिक क्षेत्रमा रहेको फिस्टेल डेरी प्रालिबाट उत्पादित ‘नोभा’ ब्रान्डको आइसक्रिम खान अयोग्य रहेको भन्दै बजारबाट तत्काल फिर्ता लिन निर्देशन दिएको छ ।

बजार अनुगमनका क्रममा संकलन गरेको आइसक्रिमको नमुना प्रयोगशालामा परीक्षण गर्दा मानव स्वास्थ्यका लागि हानिकारक जीवाणुहरू भेटिएपछि विभागले यस्तो कदम चालेको हो । 

विभागका निमिक्त महानिर्देशक सोमकान्त रिजालका अनुसार फिसटेल डेरी प्रालिले उत्पादन गर्दैआएको नोभा ब्राण्डको ब्याच नम्बर सीओ २ र उत्पादन मिति २०८२ साउन १९ गते उल्लेख भएको आइसक्रिममा ब्याक्टेरिया र कोलिफर्मको संख्या गणना गर्दा ‘इन्टेरोब्याक्टेरिएसी’ ब्याक्टेरियाको उपस्थिति पाइएको थियो ।

आइसक्रिममा ‘इन्टेरोब्याक्टेरिएसी’को उपस्थिति अत्याधिक भेटिएकाले उक्त आइसक्रिम मानव स्वास्थ्यको लागि निक्कै हानिकारक भएकाले देशभरको बजारबाट उक्त ब्याचको आइसक्रिम फिर्ता लैजान र बिक्री बितरण नगर्न रोक लगाइएको छ ।