काठमाडौं- नेपाल बार एशोसिएशनले प्रतिनिधिसभाको बैठकमा न्यायालयको मानमर्दन हुने अभिव्यक्ति र बहस रोक्न सभामुख डोलप्रसाद अर्याललाई आग्रह गरेको छ।

प्रतिनिधिसभामा राष्ट्रिय स्वतन्त्र पार्टीका उपनेता गणेश पराजुलीले कायममुकायम प्रधानन्यायाधीश सपना प्रधान मल्लले ‘सडकबाट दुईतिहाइ सरकारलाई लल्कारेको’ भन्ने अभिव्यक्ति दिएपछि बारले गम्भीर ध्यानाकर्षण भएको जनाएको हो।

नेपाल बार एशोसिएशनका महासचिव वरिष्ठ अधिवक्ता केदार प्रसाद कोइरालाले सभामुख अर्याललाई पत्र लेख्दै संसदभित्र न्यायालय र न्यायाधीशको कार्यसम्पादनमा असर पर्ने टिप्पणी हुन नदिन आवश्यक प्रबन्ध र रूलिङ गर्न आग्रह गरेका छन्।

बारले उक्त अभिव्यक्तिबाट ‘दुई तिहाइउपर कसैले केही बोल्न नपाइने’ भन्ने सन्देश गएको उल्लेख गर्दै यसले निरंकुशताको प्रवर्द्धन गर्ने खतरा रहेको जनाएको छ।

पत्रमा संविधानले शक्ति पृथकीकरण, सन्तुलन, विधिको शासन र स्वतन्त्र न्यायपालिकाको सिद्धान्तलाई लोकतान्त्रिक व्यवस्थाको आधार मानेको उल्लेख गरिएको छ। न्यायपालिकामाथि दबाब सिर्जना गर्ने वा न्यायाधीशलाई चुप लाग्न सन्देश दिने प्रवृत्ति लोकतन्त्रको आत्माविपरीत हुने बारको भनाइ छ।

बारले संविधानको धारा १०५ तथा राष्ट्रिय पञ्चायतकालीन एक नजिरसमेत स्मरण गराउँदै संसद्मा न्यायालयको मानमर्दन हुने अभिव्यक्ति रोक्न सभामुखको ध्यानाकर्षण गराएको हो।