काठमाडौं– दोस्रो पटक स्थगित भएको प्रतिनिधिसभा बैठक सहमति नजुट्दा एक घण्टादेखि सुरु हुन सकेको छैन। सरकार पक्ष र प्रतिपक्षबीचको छलफलमा सहमित जुट्न नसकेपछि सभामुखले बैठक सञ्चालनका लागि निरन्तर प्रयास गरिरहेका छन्।

सिंहदरबारस्थित संसद् भवनमा सत्तापक्ष र प्रतिपक्षका प्रमुख सचेतक तथा सचेतकहरूबीच सहमति जुटाउने प्रयास जारी छ। तर दुवै पक्ष आ–आफ्नो अडानमा कायम रहेपछि बैठक अनिश्चित बनेको छ।

अर्थमन्त्री डा. स्वर्णिम वाग्लेले नीति तथा कार्यक्रम प्रस्तुत गरेपछि त्यससम्बन्धी छलफल प्रधानमन्त्रीको उपस्थितिमा मात्र अघि बढाउनुपर्ने माग गर्दै प्रतिपक्षी दलहरूले सदन अवरुद्ध  गरेका थिए । प्रधानमन्त्री उपस्थित नभएसम्म छलफल अगाडि नबढ्ने अडान प्रतिपक्षले दोहोर्‍याएपछि बैठक दुईपटक स्थगित हुँदै  भएको हो ।

सभामुखले बैठक सञ्चालनका लागि पहल जारी राखे पनि सहमति नजुट्दा प्रक्रिया अघि बढ्न सकेको छैन।

यसैबीच, आजै बैठक पुनः बस्ने सम्भावना कम रहेको प्रतिपक्षी दलका नेताहरूले बताएका छन्। तर राष्ट्रिय स्वतन्त्र पार्टीका केही सांसदहरूले भने दलहरूबीच छलफल जारी रहेकाले बैठक सुरु हुने सम्भावना अझै बाँकी रहेको संकेत गरेका छन्।