काठमाडौं- संसद्लाई बेवास्ता गरिरहेका प्रधानमन्त्री वालेन्द्र शाहसँग सभामुख डोलप्रसाद अर्यालले संवाद गर्ने भएका छन्।

बुधबार दोस्रो पटक बसेको प्रतिनिधि सभाको बैठकमा प्रमुख प्रतिपक्षी दलका नेता भीष्मराज आङ्देम्बेले प्रधानमन्त्रीको स्वास्थ्यअवस्थाबारे प्रश्न उठाएपछि सभामुख अर्यालले जवाफमा यस्तो बताएका हुन्।

आङ्देम्बेले कांग्रेससहित प्रतिपक्षी दलहरूले बैठकमा छलफलका लागि नीति तथा कार्यक्रम टेबल गर्न दिए अब भने प्रधानमन्त्री चाहिने अडान राखेका थिए ।

‘हामीले नीति तथा कार्यक्रम टेबल गर्न दिएका छौँ । सभामुखको शालीनता देखेर यो निर्णय गरेका हौँ’, उनले भने, ‘तर अब यसमाथि छलफलका क्रममा प्रधानमन्त्री आउनुपर्छ । प्रधानमन्त्री नआएसम्म छलफल अघि बढ्न सक्दैन।’

त्यसपछि सभामुख अर्यालले आफूले आजको संसद् बैठकपछि प्रधानमन्त्रीसँग संवाद गर्ने बताए । ‘मैले यहाँबाट रुलिङ गर्ने भन्दा एक पटक प्रधानमन्त्रीको अवस्था बुझ्न म संवाद गर्न जाँदैछु । बैठकपछि म उहाँलाई भेटेर कुरा गर्छु’, उनले भने, ‘उहाँको सबै अवस्था बुझेर थप निर्णय गरिनेछ। अहिले रुलिङ गर्नतिर जानेभन्दा पहिले प्रमको अवस्था बुझेर अघि बढौँला।’

उनले सदनलाई संसारभरबाट हेरिरहेको बताउँदै प्रधानमन्त्रीले अर्थमन्त्रीलाई प्रतिनिधि बनाएर पठाइसकेकाले अब छलफल अघि बढाउन प्रतिपक्षीहरूलाई आग्रह गरे ।