काठमाडौं– देशभरका यातायात व्यवसायीको छाता संगठन नेपाल यातायात व्यवसायी राष्ट्रिय महासंघको नयाँ नेतृत्व चयनका लागि मतदान जारी रहेको छ ।

महासंघको ७औँ राष्ट्रिय महाधिवेशनअन्तर्गत मंगलबारका लागि तय गरिएको मतदान उम्मेदवारी दर्तामा विवाद भएपछि स्थगित गरिएको थियो । त्यसपछि बुधबार बिहान ७ बजेदेखि मतदान सुरु गरिएको हो ।

२७ वैशाखबाट सुरु भएको महाधिवेशन २९ वैशाखसम्म सञ्चालन हुने कार्यक्रम रहेको थियो ।

महासंघका अनुसार देशभरबाट आएका १ हजार ५ सयभन्दा बढी प्रतिनिधिले यसपटक विद्युतीय मतदान मेसिन (ईभीएम) मार्फत मतदान गरिरहेका छन् । मतदान प्रक्रिया साँझसम्म जारी रहने जनाइएको छ ।

मतदानबाट निर्वाचित हुने नयाँ कार्यसमितिले आगामी तीन वर्षसम्म महासंघको नेतृत्व सम्हाल्नेछ ।

महासंघको केन्द्रीय अध्यक्ष पदका लागि वर्तमान कार्यसमितिका वरिष्ठ उपाध्यक्षद्वय पुण्यप्रसाद सिटौला र हरिशरण केसीबीच मुख्य प्रतिस्पर्धा रहेको छ ।