काठमाडौं– पञ्जाबी गायक तथा अभिनेता दिलजीत दोसांझ हालै क्यानडाको क्यालगरीमा आयोजित आफ्नो कन्सर्टका कारण विवादमा तानिएका छन्।

 कार्यक्रममा केही व्यक्तिहरूले ‘प्रो–खालिस्तान’ झण्डा प्रदर्शन गर्दै विरोध जनाएपछि माहोल तनावपूर्ण बनेको थियो। उक्त घटनापछि सामाजिक सञ्जालमा पनि व्यापक बहस सुरु भएको छ।

विवादपछि पहिलो पटक सार्वजनिक प्रतिक्रिया दिँदै दिलजीतले सामाजिक सञ्जालमार्फत आफ्नो धारणा स्पष्ट पारेका छन्। उनले कन्सर्टभित्र आएर फ्यानहरूलाई असहज बनाउने वा कार्यक्रम अवरोध गर्ने गतिविधि स्वीकार्य नहुने बताएका छन्।

दिलजीतले आफू कुनै पनि झण्डा, ब्यानर वा संगठनसँग सम्बन्धित नरहेको स्पष्ट पार्दै बाहिर बसेर शान्तिपूर्ण विरोध गर्न सकिने तर कार्यक्रमभित्र प्रवेश गरेर दर्शकलाई समस्या दिने कार्य सहन नसकिने उल्लेख गरेका छन्।

उनले सुरक्षाकर्मीलाई यस्ता गतिविधिमा संलग्न व्यक्तिहरूलाई तत्काल नियन्त्रणमा लिन निर्देशन दिएको पनि बताएका छन्।

साथै, आफ्नो नाम जोडेर सामाजिक सञ्जालमा फैलाइएका ‘फेक नैरेटिभ’प्रति आपत्ति जनाउँदै उनले लामो समयदेखि मौन बसे पनि अब स्पष्ट बोल्न बाध्य भएको प्रतिक्रिया दिएका छन्।

दिलजीतले आफ्ना कन्सर्टहरू शान्त, सुरक्षित र फ्यानमैत्री वातावरणमा सञ्चालन हुनुपर्नेमा जोड दिएका छन्।