पोखरा– नेपाल यातायात व्यवसायी राष्ट्रिय महासंघको अध्यक्ष पदका लागि आज निर्वाचन हुँदैछ । महासंघको सातौँ महाधिवेशन २७ गतेदेखि पोखरामा जारी छ ।

अध्यक्ष पदका लागि पुण्यप्रसाद सिटौला ‘सरोज’ र हरिशरण केसीबीच प्रतिस्पर्धा हुने भएको छ । महाधिवेशनले आजै आगामी तीन वर्षका लागि नयाँ केन्द्रीय कार्यसमिति चयन गर्ने कार्यक्रम रहेको अध्यक्ष पदका उम्मेदवार सिटौलाले जानकारी दिए ।

महाधिवेशनमा देशभरका ३८७ वटा संस्थाबाट आएका १५ सयभन्दा बढी प्रतिनिधि तथा मतदाता सहभागी भएका छन् ।

यसबीच अध्यक्ष पदका उम्मेदवार केसीलाई नेपाल ट्रक यातायात व्यवसायी महासंघले समर्थन गरेको चर्चा सार्वजनिक भएपछि ट्रक महासंघले त्यसको खण्डन गरेको छ ।

महासंघका अध्यक्ष राजेन्द्र विक्रम बानियाँले विज्ञप्ति जारी गर्दै नेपाल ट्रक यातायात व्यवसायी महासंघले निर्वाचन प्रक्रियामा तटस्थ भूमिका अपनाएको स्पष्ट पारेका छन् ।

उनले सामाजिक सञ्जाल, केही अनलाइन सञ्चारमाध्यम तथा पत्रपत्रिकामार्फत प्रकाशित समर्थनसम्बन्धी समाचार आधिकारिक नभएको बताएका छन् ।

विज्ञप्तिमा भनिएको छ, ‘नेपाल ट्रक यातायात व्यवसायी महासंघ एक स्वायत्त संस्था भएकाले नेपाल यातायात व्यवसायी राष्ट्रिय महासंघको उच्च सम्मान गर्दछ । आसन्न अधिवेशनमा कुनै पनि उम्मेदवारलाई आधिकारिक समर्थन नगरेको व्यहोरा सबैमा जानकारी गराइन्छ ।’