काठमाडौं– नेपाल मेडिकल काउन्सिलले विदेशी नागरिकता लिएका गैरआवासीय नेपाली (एनआरएन) चिकित्सकहरूको दर्ता खारेज गर्ने निर्णय गरेकोप्रति नेपाल चिकित्सक संघले आपत्ति जनाएको छ । 

संघले सोमबार एक प्रेस विज्ञप्ति जारी गर्दै काउन्सिलको यो कदमलाई अन्यायपूर्ण, आपत्तिजनक र अपमानजनक भएको बताएको छ । 

संघका महासचिव डा.सञ्जीव तिवारीद्वारा हस्ताक्षरित विज्ञप्तिमा विदेशमा रहेका नेपाली चिकित्सक तथा स्वास्थ्यकर्मीहरूलाई स्वदेश फर्किन र उनीहरूले विदेशमा हासिल गरेको ज्ञान एवं अनुभवलाई नेपालको स्वास्थ्य क्षेत्रको विकासमा लगाउन प्रोत्साहन गर्नुपर्नेमा जोड दिइएको छ। 

प्रोत्साहनका लागि सहज वातावरण निर्माण गर्नुको सट्टा विदेशी नागरिकता लिएको आधारमा दर्ता नै खारेज गर्नु न्यायसंगत नभएको संघको ठहर छ। 

नेपालको स्वास्थ्य क्षेत्रमा एनआरएन चिकित्सकहरूले पुर्‍याएको योगदानको कदर गर्नुको सट्टा उनीहरूको आत्मसम्मान र व्यक्तिगत स्वतन्त्रता समेत हनन हुने किसिमको निर्णय गरिनु अत्यन्तै आपत्तिजनक छ, विज्ञप्तिमा भनिएको छ।

एकपटकको नेपाली सधैँको नेपाली भन्ने मूल मर्मलाई आत्मसात् गर्दै विदेशमा रहेका नेपाली चिकित्सकहरूको नाम दर्ताका लागि काउन्सिलमा रहेको साविकको अनलाइन पोर्टलको व्यवस्थालाई नै निरन्तरता दिन संघले माग गरेको छ।

नेपाल चिकित्सक संघले यो अन्यायपूर्ण निर्णय तत्काल फिर्ता लिन र विद्यमान नियम तथा कानुन अनुसार दर्ता प्रक्रियालाई अगाडि बढाउन नेपाल मेडिकल काउन्सिल र सम्बन्धित निकायहरूसँग माग समेत गरेको छ ।