काठमाडौं– सोमबार बसेको प्रतिनिधिसभामा नेकपा एमालेकी सचिव तथा सांसद पद्मा अर्यालले सरकारले ल्याएका अध्यादेशहरू तत्काल खारेज गर्न माग गरेकी छन्।

संसद्‌मा बोल्दै उनले सरकारले ‘नयाँ सोच र नयाँ गति’ भन्दै अघि बढे पनि व्यवहारमा त्यसको प्रतिविम्ब नदेखिएको र सरकार निर्णय प्रक्रियामा उठ्ने प्रश्नबाट भाग्न खोजिरहेको आरोप लगाइन्। 

अर्यालले न्यायपालिकासम्बन्धी व्यवस्था कार्यपालिकाको इच्छाअनुसार नभई, विधि र प्रक्रियाअनुसार हुनुपर्नेमा जोड दिइन्। उनले राजनीतिक आस्थालाई सीमित गर्ने गरी विद्यार्थी संगठन र ट्रेड युनियनसम्बन्धी प्रावधान अध्यादेशमार्फत ल्याइएको भन्दै आपत्ति जनाइन्।

उनले भनिन्, ‘आज हामी खतराको सङ्घारमा छौं। सरकारले नयाँ सोच र गति भने पनि व्यवहारले त्यो देखाएको छैन। सरकार आफ्ना निर्णयमाथि उठ्ने प्रश्नबाट भाग्न खोजिरहेको छ। न्यायपालिकाको प्रमुख प्रधानमन्त्रीको तर्जुमा अनुसार हुने कुरा ठिक होइन।’

अर्यालले यस्ता कदमले लोकतान्त्रिक मूल्य कमजोर पार्ने र तानाशाही प्रवृत्तितर्फ लैजाने खतरा रहेको दाबी गरिन्। उनले संसद्‌भन्दा सरकार माथि हुन नसक्ने स्पष्ट गर्दै प्रस्तुत सबै अध्यादेशहरू तत्काल खारेज गर्न माग गरिन्।