काठमाडौं– भक्तपुरस्थित शहीद धर्मभक्त राष्ट्रिय प्रत्यारोपण केन्द्रमा एकैदिन १५६ जना बिरामीले हेमोडायलासिस सेवा लिएका छन् । 

केन्द्रले सार्वजनिक गरेको वैशाख २७ गतेको दैनिक विवरणअनुसार नियमित, आकस्मिक र विशेष हेमोडायलासिस सेवा सञ्चालन गरिएको हो । विवरणअनुसार नियमित हेमोडायलासिसतर्फ बिहान र बेलुका ४२-४२ तथा लेट इभिनिङ र राति ३६-३६ जना गरी कुल १५६ जनाले सेवा लिएका हुन् । 

त्यस्तै आकस्मिक हेमोडायलासिस सेवा ५ जनालाई प्रदान गरिएको छ भने विशेष हेमोडायलासिसअन्तर्गत सेरोपोजिटिभ बिरामीका लागि १५ वटा सत्र सञ्चालन गरिएको केन्द्रले जनाएको छ । 

केन्द्रको इन्पेसियन्ट वार्डतर्फ कुल ६३ शय्यामध्ये ५२ शय्या भरिएका छन् भने ११ शय्या खाली रहेका छन् । सबैभन्दा बढी बिरामी नेफ्रोलोजी वार्डमा रहेका छन्, जहाँ १२ वटै शय्या भरिएका छन् । प्रि–ट्रान्सप्लान्ट वार्डमा ११ जना, ट्रान्सप्लान्ट आईसीयूमा ५ जना तथा पोस्ट ट्रान्सप्लान्ट वार्डमा ८ जना बिरामी भर्ना रहेको विवरणमा उल्लेख छ ।

त्यस्तै रेडियोलोजीतर्फ एकैदिन १७ वटा एक्स–रे सेवा प्रदान गरिएको छ । प्रयोगशालातर्फ भने ३१२ वटा परीक्षण सम्पन्न भएका छन् । जसमा हेमाटोलोजीका ११३, बायोकेमिस्ट्रीका ११३, इम्युनोलोजीका ३३ र माइक्रोबायोलोजीका १९ वटा परीक्षण रहेका छन् ।

केन्द्रले उक्त अवधिमा कुनै पनि वार्डमा मृत्यु नभएको जनाएको छ ।