काठमाडौं– भौतिक पूर्वाधारमन्त्री सुनील लम्सालले नेपाल यातायात व्यवसायी राष्ट्रिय महासंघद्वारा आयोजना हुन लागेको सातौं राष्ट्रिय महाधिवेशनको अवसरमा शुभकामना व्यक्त गरेका छन् ।

उनले उक्त महाधिवेशनले समग्र यातायात क्षेत्रको सुधार, नीतिगत स्पष्टता तथा दिगो विकासका लागि ठोस मार्गचित्र निर्माण गर्ने विश्वास व्यक्त गरे ।

शुभकामना सन्देशमा उनले यातायात क्षेत्र राष्ट्रको आर्थिक, सामाजिक तथा पर्यटन विकाससँग प्रत्यक्ष रूपमा जोडिएको आधारभूत क्षेत्र भएको उल्लेख गरेका छन् ।

उनले यातायात क्षेत्रको आधुनिकीकरण, व्यवस्थापन सुधार तथा सेवामुखी रूपान्तरणका लागि सरकार र निजी क्षेत्रबीचको सहकार्य अझ सुदृढ हुनुपर्ने आवश्यकता औंल्याए ।

महाधिवेशनले यातायात क्षेत्रसँग सम्बन्धित विषयमा गहन छलफल गरी व्यवहारिक तथा प्रभावकारी निष्कर्ष निकाल्ने अपेक्षा समेत मन्त्री लम्सालले व्यक्त गरेका छन् ।