सप्तरी- सप्तरीको छिन्नमस्तामा गाउँपालिकामा वडाध्यक्ष पदको उपनिर्वाचन २०७६ का लागि निर्वाचन अधिकृतको कार्यालय स्थापना गरिएको छ ।

गाउँपालिकाको साविक भवन तथा श्री भुपेन्द्रनारायण संस्कृत माध्यमिक विद्यालयमा कार्यालय स्थापना गरिएको हो । गाउँपालिकाको वडा नं ७ मा हुन लागेको वडाध्यक्ष पदको उपनिर्वाचनका लागि निर्वाचन अधिकृतको कार्यालय स्थापना गरिएको जिल्ला निर्वाचन कार्यालयले जनाएको छ ।

छिन्नमस्ता गाउँपालिका–७ का वडाध्यक्षमा राजपाबाट निर्वाचित प्रभाकर यादव जिल्ला समन्वय समितिका प्रमुख पदमा निर्वाचित भएपछि रिक्त रहेको उक्त पदका लागि उपनिर्वाचन हुन लागेको हो ।

उपनिर्वाचनका लागि मुख्य निर्वाचन अधिकृतमा जिल्ला न्यायाधीश चन्द्रमणि ज्ञवालीलाई जिम्मेवारी दिइएको छ । पहिलो स्थानीय तहको निर्वाचनमा सो वडामा एक हजार १७५ मतदाता रहेकोमा अहिले २२८ मतदाता थपिएर जम्मा मतदाता एक हजार ४०३ पुगेको छ । अगामी मङ्सिर १४ गते हुने उपनिर्वाचनका लागि सप्तरीमा पनि निर्वाचनको गतिविधि तीव्र भइरहेको छ ।

प्रमुख जिल्ला अधिकारी सुनिल खनालको नेतृत्वमा विभिन्न सुरक्षा निकायका प्रमुखलगायतका सुरक्षाकर्मीले स्थलगत निरीक्षण गरी उक्त कार्यालयको स्थापना गरिएको थियो ।