काठमाडौं – वितरकसँगको आर्थिक कारोबारको विवादबारे नायक भुवन केसीले मुख खोलेका छन् ।

वितरक कम्पनी काफिया फिल्मसका सञ्चालक गोबिन्द शाहीले भुवनसँगको ५० लाखको लेनदेनको विषय सार्वजनिक गरेका थिए ।

भुवनका छोरा अनमोल शीर्ष भूमिकामा रहेको फिल्म ‘बाटुलो जुन’सँग यो विवाद सम्बन्धित छ । 

यही फिल्म निर्माणका लागि भुवनले आफूसँगबाट ५० लाख लगेको शाहीले खबरहबलाई बताए । 

तर, भुवनले फिल्म अर्कै वितरकबाट प्रदर्शन गर्ने लागेको शाहीको आरोप छ । उनले आर्थिक लेनदेनको सम्झौता पत्र सार्वजनिक पनि गरेका छन् । 

प्रदर्शन मितिमा कुरा नमिल्दा शाहीसँग सहकार्य नहुने जस्तो अवस्था सिर्जना भएको भुवनको स्पष्टीकरण छ । 

भएको के हो ? 

आफ्नो निर्देशन र छोराको शीर्ष भूमिका रहेको फिल्म भुवन आगामी दशैँमा प्रदर्शनमा ल्याउन चाहन्छन् । फूलपातीको अघिल्लो दिन असोज ३० गते ‘बाटुलो जुन’को प्रदर्शन मिति तोकिएको छ । 

यही प्रदर्शन मितिमा कुरा नमिल्दा भुवन र वितरक शाहीको आर्थिक लेनदेन बाहिर आएको हो । शाही पक्षबाट यो कुरा सार्वजनिक भएको हो । 

नायक विराज भट्ट निकट रहेका शाही यो मितिमा ‘१२ गाउँ २’ प्रदर्शनमा ल्याउने तयारीमा छन् । 

उनी विराजको फिल्म छाड्ने पक्षमा छैन । विराज र भुवन दुवैको फिल्म एकसाथ प्रदर्शनमा ल्याउन सम्झौताले दिँदैन । 

शाहीसँग कुरा नमिलेपछि भुवनले अर्का वितकरसँग कुरा अगाडि बढाएका छन् । सोहीकारण शाहीले भुवनलाई आफूसँगको आर्थिक कारोबार मिलाउन स्मरण गराएका हुन् । 

‘बाटुलो जुन’ बनाउन वितरक शाहीबाट पैसा लिएको भुवन आफैँ स्वीकार गर्छन् । 

यो विवादको समाधान हिसाब मिलाउनु नै रहेको भुवनको बुझाइ छ । तर, ‘सकेसम्म शाहीले फिल्म वितरणको गरे हुन्थ्यो’ भन्ने मनस्थितिमा आफू रहेको भुवन बताउँछन् । 

दुवै फिल्म एकसाथ वितरण गर्नु भनी गरेको प्रस्ताव पनि शाहीले अस्वीकार गरेको भुवनले बताए ।

भुवन भन्छन्, ‘उहाँले चलाइदिनुभयो भने ठीक छ नभए फिर्ता गर्छौं । अर्को वितरक खोज्छौं । उहाँहरूको पैसा फिर्ता गरेर मात्रै हामी फिल्म हलमा लगाउँछौं ।’

अहिलेसम्म आफूले फिल्म अर्का वितरकलाई नदिएको भुवनको दाबी छ ।