काठमाडौँ – नेपाली कांग्रेसका नेता एवं प्रमुख प्रतिपक्षी दलका संघीय संसदीय दलका नेता भीष्मराज आङदेम्बेले स्वतन्त्र प्रेस लोकतन्त्रको अभिन्न खम्बा भएको बताएका छन् । विश्व प्रेस स्वतन्त्रता दिवस (मे ३) को अवसरमा शुभकामना सन्देश जारी गर्दै उनले प्रेसको स्वतन्त्रता, पत्रकारको सुरक्षा र सम्मानका लागि कांग्रेस सधैँ प्रतिबद्ध रहने स्पष्ट पारेका छन्।

नेपालको संविधानले पूर्ण प्रेस स्वतन्त्रता, विचार र अभिव्यक्तिको स्वतन्त्रताका साथै सूचनाको हकलाई मौलिक हकका रूपमा सुनिश्चित गरेको उल्लेख गर्दै नेता आङदेम्बेले यसलाई सुरक्षित र सार्थक बनाउन आफ्नो दलको सदा साथ रहने बताए ।

शुभकामना सन्देशमा उनले भनेका छन्, “आजको प्रविधिले सिर्जना गरेको सूचना प्रदूषणको अवस्थाबाट आम मानिसलाई बचाउन र सत्य एवं गुणस्तरीय सूचनाबाट सुसूचित गरेर विवेकशील नागरिक तयार गर्न पत्रकारिता जगत्‌को काँधमा महत्वपूर्ण जिम्मेवारी थपिएको छ।”

नेता आङदेम्बेले सरकार र राज्यका निकायहरूमा हुनसक्ने स्वेच्छाचारी प्रवृत्तिलाई नियन्त्रण गर्न प्रेसले ‘वाचडग’ का रूपमा सशक्त भूमिका खेल्नुपर्नेमा जोड दिएका छन्। प्रेसमाथि हुने कुनै पनि प्रकारका नियन्त्रण र आक्रमणको प्रतिकार गर्न नेपाली कांग्रेस सदैव सजग रहने प्रतिबद्धता पनि उनले व्यक्त गरेका छन्।

सञ्चार क्षेत्रको नीतिगत सुधार र समस्या समाधानमा आफ्नो दलको निरन्तर समर्थन रहने उल्लेख गर्दै उनले प्रेस स्वतन्त्रताका लागि संघर्ष गर्ने विश्वभरका पत्रकारहरूप्रति सम्मान प्रकट गरेका छन्।