काठमाडौँ- राष्ट्रिय स्वतन्त्र पार्टी (रास्वपा) की सांसद रिमा विश्वकर्माले पीडितको जाहेरी समेत दर्ता नगरेर सरकारले न्यायको ढोका बन्द गरेको आरोप लगाएकी छन्।

सांसद विश्वकर्माले सिन्धुलीमा घटेको एक घटनाको सन्दर्भ जोड्दै प्रहरी र सरकारी वकिलको कार्यालयले किटानी जाहेरी लिन अस्वीकार गरेकोमा आपत्ति जनाइन् । “पीडित परिवारले किटानी जाहेरी दर्ता गर्न खोज्दा सिन्धुली प्रहरी र सरकारी वकिलको कार्यालयले जाहेरी लिन अस्वीकार गरेछ,” उनले फेसबुकमा लेखेकी छन्, “जाहेरी समेत दर्ता नभएपछि जनताले न्याय कसरी पाउँछन् सरकार ?”

उनले कानुनी उपचारको पहिलो खुड्किलो मानिने जाहेरी दर्तामै राज्यका निकायले अवरोध सिर्जना गर्दा नागरिकको राज्यप्रतिको भरोसा टुट्दै गएको बताइन् । दोषीलाई राजनीतिक वा अन्य दबाबका आधारमा संरक्षण नगर्न र तत्काल जाहेरी दर्ता गरी कानुनी प्रक्रिया अगाडि बढाउन उनले सरकारको ध्यानाकर्षण गराएकी छन् ।

प्रहरी हिरासतमा हत्या गरिएका सिन्धुलीका दलित युवा श्रीकृष्ण विकका परिवारले दिएको जाहेरी दर्ता नभएको भन्दै उनले आपत्ति जनाएकी हुन् ।