काठमाडौं– राष्ट्रिय स्वतन्त्र पार्टी (रास्वपा) का सभापति रवि लामिछानेले जनअपेक्षा पूरा गर्न तथा आवश्यक सुधारका लागि सरकारले अध्यादेश सिफारिस गरेको बताएका छन् । 

बुधबार संसदीय दलको बैठकपछि सञ्चारकर्मीसँग कुरा गर्दै लामिछानेले कसैलाई दुःख दिन वा कसैलाई सुविधा दिन नभई आवश्यक सुधारका लागि सरकारले अध्यादेश ल्याएको बताएका हुन् ।

जनताले ठूलो अपेक्षाका साथै रास्वपालाई विजयी गराएको भन्दै जनताको अपेक्षा अनुसार छिटो काम गर्न सरकारले अध्यादेश ल्याएको उनको भनाइ छ ।

उनले विगतमा भएको अनावश्यक दलीयकरण र गलत नियुक्तिलाई सच्चाएर सक्षमहरूलाई नियुक्ति गर्नका लागि संवैधानिक परिषद्सम्बन्धी अध्यादेश ल्याएको बताए । 

सभापति लामिछाने जोखिमयुक्त क्षेत्रको बस्ती व्यवस्थापनका क्रममा सरकारले सुकुम्वासी बस्ती हटाइएको भन्दै कसैलाई घरबारविहीन नबनाउने उल्लेख गरे । घरबारविहीन नागरिकको उचित व्यवस्थापनको जिम्मा सरकारले लिने उनको भनाइ छ ।

रास्वपा सभापति लामिछानेले निवर्तमान गृहमन्त्री सुधन गुरुङमाथि छानबिनको प्रक्रिया चाँडै सुरु हुने जानकारी दिए । रास्वपाले १०० दिनमा गर्नुपर्ने कामका विषयमा लामिछानेले जनतासँग गरिएका प्रतिबद्धता पुरा गर्ने गरी काम भइरहेको धारणा राखे ।