काठमाडौं – भारतमा जारी इन्डियन प्रिमियर लिग अन्तर्गत दिल्ली र पञ्जाबबीच शनिबार भएको खेलका क्रममा एक गम्भीर दुर्घटना भएको छ। दिल्ली क्यापिटल्सका तीव्र गतिका बलर लुंगी एङ्गिडी बल समात्ने क्याच गर्ने क्रममा टाउकोमा गम्भीर चोट लागेको हो ।

अरुण जेटली रंगशालामा भएकाे खेलको क्रममा एङ्गिडी पछाडि फर्किएर बल समात्न खोज्दा सन्तुलन गुमाएर जमिनमा पछारिएका थिए। उनको टाउको जमिनमा ठोक्किँदा ठूलो असर परेको देखिएको थियो, जसका कारण खेल करिब १५ मिनेटसम्म रोकिएको थियो।

घटना पञ्जाबको इनिङ्सको तेस्रो ओभरमा भएको थियो । अक्षर पटेलले फालेको बलमा ब्याट्सम्यान प्रियांश आर्याले हावामा प्रहार गरेका थिए । मिड अफ क्षेत्रतर्फ गएको उक्त बल समात्न एङ्गिडी तीव्र गतिमा पछाडि दौडिएका थिए। तर बलको दिशा अनुमान गर्न सानो गल्ती हुँदा उनी लड्न पुगे र टाउकोका साथ जमिनमा ठोक्किए।लडेपछि उनी तुरुन्तै मैदानमै पल्टिएर टाउको समात्दै पीडामा देखिएका थिए।

घटनापछि मैदानमा तुरुन्त स्ट्रेचर ल्याइएको थियो। त्यसपछि चिकित्सकसहितको टोली दौडेर पुगेको थियो। प्रारम्भिक अवस्थामा एङ्गिडीले प्रतिक्रिया जनाइरहेको देखिए पनि पछि अवस्था केही चिन्ताजनक देखिएपछि थप सतर्कता अपनाइएको थियो।

अन्ततः मैदानमै एम्बुलेन्स बोलाइयो र उनलाई स्ट्रेचरमार्फत अस्पताल पठाइएको थियो। आयोजकले सार्वजनिक गरेको जानकारी अनुसार अहिले उनको अवस्था खतरामुक्त रहेको र छिट्टै डिस्चार्ज गरिने बताइएको छ।

पूरै घटनाक्रमका क्रममा खेलाडी, निर्णायक र व्यवस्थापक टोलीले चिन्ताका साथ अवस्था नियालेका थिए। गम्भीर चोटका कारण खेल करिब १५ मिनेटसम्म स्थगित गरिएको थियो। ।