काठमाडौं– नेपाली कांग्रेसले संविधान संशोधनका लागि सुझाव संकलन गर्न गठित समितिलाई पूर्णता दिएको छ । यसअघि उपसभापति पुष्पा भुसाललाई संयोजक तोकेर गठन गरिएको समितिमा पार्टीले वरिष्ठ अधिवक्ताहरूलाई समेटिएको छ ।

समितिका सदस्यहरूमा राधेश्याम अधिकारी, हरिहर दाहाल, प्रेमबहादुर खड्का, उपेन्द्रकेशरी न्यौपाने, शेरबहादुर केसी, यदुनाथ खनाल, गोपालकृष्ण घिमिरे, योगेन्द्रबहादुर अधिकारी, दिनेश त्रिपाठी, सीताराम केसी र ललितकुमार बस्नेत चयन भएका छन् ।

समितिले पार्टीको संविधान संशोधन सम्बन्धी सुझाव संकलन गरी नेतृत्वलाई प्रतिवेदन बुझाउने अपेक्षा गरिएको छ ।

यसैबीच, कांग्रेस नेता धनराज गुरुङले पार्टी एकतामा जोड दिएका छन् । उनले ढिलो–चाँडो भए पनि कांग्रेस एक ढिक्का भएर महाधिवेशनमा जानुपर्ने बताएका छन् ।

‘असन्तुष्ट साथीहरूलाई मेरो आग्रह छ, कांग्रेस एक धारमा आएर महाधिवेशनमा केन्द्रित होऔँ। जनताले हाम्रो गतिविधिलाई नजिकबाट हेरिरहेका छन्,’ उनले भने ।