काठमाडौं – होर्मुज जलडमरूमा शनिबार दिउँसो दुई भारतीय व्यापारी जहाजमाथि गोलीबारी भएको घटना सार्वजनिक भएको छ ।

अन्तर्राष्ट्रिय समाचार एजेन्सी एएनआईका अनुसार इरानको रिभोल्युसनरी गार्डका दुई गनबोट ती ट्यांकर नजिक पुगेका थिए र कुनै रेडियो चेतावनीबिना नै फायरिङ सुरु गरेका थिए ।

गोलीबारी भएपछि दुवै भारतीय जहाज होर्मुज पार नगरी फर्किएका छन् । ती जहाज र त्यसमा रहेका सबै चालक दलका सदस्यहरू सुरक्षित रहेको जनाइएको छ। घटनामा संलग्न एक जहाजले करिब २० लाख ब्यारेल इराकी तेल बोकेको बताइएको छ।

घटनापछि भारत सरकारले कडा प्रतिक्रिया जनाएको छ । भारतको परराष्ट्र मन्त्रालयले नयाँदिल्लीस्थित इरानका राजदूत डा. मोहम्मद फथअलीलाई बोलाएर औपचारिक विरोध जनाएको छ। भारतले अन्तर्राष्ट्रिय जलमार्गमा यस प्रकारको आक्रमण अस्वीकार्य रहेको स्पष्ट पारेको छ।

यसअघि इरानले होर्मुज जलडमरू बन्द गर्ने घोषणा गरेको थियो। अमेरिकाले युद्धविराम उल्लंघन गरेको आरोप लगाउँदै इरानले होर्मुज बन्द गर्ने घोषणा गरेका थियो । तर, केही घण्टामै इरानले आफ्नो निर्णय परिवर्तन गरेको जनाइएको छ। यो घटनाले क्षेत्रीय तनाव थप चर्काउने संकेत देखिएको छ र अन्तर्राष्ट्रिय समुदायको ध्यान पुनः मध्यपूर्वतर्फ केन्द्रित भएको छ।