काठमाडौं– इरानका सर्वोच्च नेता आयतोल्लाह अली खामेनीका सैन्य सल्लाहकार मोहसेन रेजाईले इरानको अधिकार पूर्ण रूपमा सुरक्षित नभएसम्म होर्मुजको स्ट्रेटबाट पछि नहट्ने चेतावनी दिएका छन् ।

इरानी मिडियालाई उद्धृत गर्दै आएको विवरणअनुसार रेजाईले इरानको समुद्री मार्ग र बन्दरगाहहरूमा कुनै पनि प्रतिबन्ध वा नाकाबन्दी स्वीकार्य नहुने बताएका छन् । उनले इस्लामिक रिभोलुसनरी गार्ड कर्प्स (आईआरजीसी) का पूर्व कमान्डरको हैसियतमा इरानले आफ्नो जलमार्गमा आर्थिक तथा सामुद्रिक गतिविधिमाथि नियन्त्रण कायम राख्ने दाबी गरेका छन् ।

रेजाईले पछिल्ला वार्ता र सम्झौताहरूलाई अझ सावधानीपूर्वक पुनःमस्यौदा गर्नुपर्ने आवश्यकता रहेको उल्लेख गर्दै इरानको हित सुनिश्चित नभएसम्म कुनै पनि सम्झौता अघि नबढ्ने संकेत दिएका छन् ।

यसैबीच, होर्मुज जलमार्ग पछिल्ला दिनमा इरान र संयुक्त राज्य अमेरिकाबीचको तनावको केन्द्र बनेको छ । इरानी बन्दरगाहहरूमा अमेरिकी पक्षले नाकाबन्दी लागू गरेको भन्दै इरानले कडा आपत्ति जनाएको बताइएको छ ।

अमेरिकी सेन्ट्रल कमाण्ड (सेन्टकम) का कमाण्डर एडमिरल ब्राड कुपरले ३६ घण्टाभित्र इरानमा सैन्य अपरेसन अघि बढाइने दाबी गरेको विवरण पनि सार्वजनिक भएका छन् । यद्यपि यी दाबीहरूको स्वतन्त्र पुष्टि भने भएको छैन ।