काठमाडौं– राष्ट्रिय स्वतन्त्र पार्टीले सार्वजनिक लेखा समितिको सभापति प्रमुख प्रतिपक्षी दललाई दिने निर्णय गरेको छ। पार्टीका महामन्त्री कविन्द्र बुर्लाकोटीले नियमअनुसार उक्त जिम्मेवारी प्रमुख प्रतिपक्षीलाई दिन लागिएको जानकारी दिएका छन्।

यस निर्णयसँगै नेपाली कांग्रेसले सार्वजनिक लेखा समितिको सभापति पाउने भएको छ। कांग्रेसले यसअघि नै समितिको नेतृत्वका लागि उम्मेदवारी दिने संकेत गरिसकेको थियो। कांग्रेस नेता भीष्मराज आङ्देम्बेले प्रमुख प्रतिपक्षी दलका तर्फबाट सभापतिमा दाबी रहने बताएका थिए।

कांग्रेसभित्र सभापतिका लागि भीष्मराज आङ्देम्बे, निष्कल राई लगायतका नेताहरूको नाम चर्चामा रहेको छ।

२०७९ सालको निर्वाचनपछि नेकपा एमालेका ऋषिकेश पोखरेल सार्वजनिक लेखा समितिको सभापति बनेका थिए। एमाले र कांग्रेसबीच सरकार गठन भएपछि सत्तापक्षकै नेताले लेखा समितिको नेतृत्व लिएको भन्दै आलोचना भएको थियो।