काठमाडौं– चालु आर्थिक वर्षको ९ महिनामा सरकारको खर्च आम्दानीको तुलनामा डेढ खर्ब बढी भएको छ । महालेखा नियन्त्रक कार्यालयकाअनुसार चालु आर्थिक वर्षको चैत मसान्तसम्म सरकारले ९ खर्ब ७ अर्ब १७ करोड ७१ लाख रुपैयाँ आम्दानी गर्दा खर्च भने १० खर्ब ५९ अर्ब ९५ करोड ७२ लाख रुपैयाँ गरेको छ ।

चालु आर्थिक वर्षमा सरकारले कर र गैरकर गरेर १४ खर्ब ८० अर्ब रुपैयाँ आम्दानी गर्ने लक्ष्य राखेकोमा ९ महिनाको अवधिसम्म यस्तो आय जम्मा ८ खर्ब ८६ अर्ब २८ करोड ३६ लाख रुपैयाँ मात्रै गरेको छ । जुन लक्ष्यको तुलनामा जम्मा ५९.८८ प्रतिशत मात्रै हो ।

त्यस्तै, सरकारले चालु आर्थिक वर्षमा ५३ अर्ब ४४ करोड ६९ लाख रुपैयाँ अनुदान प्राप्त गर्ने लक्ष्य तय गरेकोमा समीक्षा अवधिसम्म यस्तो आय जम्मा २९.२१ प्रतिशत अर्थात् १५ अर्ब ६१ करोड ४१ लाख रुपैयाँ मात्रै आम्दानी गरेको छ ।

पुँजीगत खर्च निकै कमजोर, चालु खर्च ६३ प्रतिशत

विगतका वर्षमा भन्दा पनि चालु आर्थिक वर्षमा सरकार पुँजीगत खर्च गर्न निकै कमजोर देखिएको छ । सरकारले चालु आर्थिक वर्षमा ४ खर्ब ७ अर्ब ८८ करोड ८० लाख रुपैयाँ पुँजीगत खर्च गर्ने लक्ष्य राखेकोमा समीक्षा अवधिसम्म २३.५८ प्रतिशत अर्थात् ९६ अर्ब १९ करोड ५१ लाख रुपैयाँ मात्रै  खर्च गरेको छ ।

तर, चालु खर्च तर्फभने सरकारले चालु आर्थिक वर्षमा ११ खर्ब ८० अर्ब ९८ करोड खर्च गर्ने लक्ष्य राखेकोमा चैत मसान्तसम्म ६३.३ प्रतिशत अर्थात् ७ खर्ब ४७ अर्ब ५२ करोड ४४ लाख रुपैयाँ खर्च गरेको महालेखा नियन्त्रक कार्यालयले जनाएको छ ।

त्यस्तै, समीक्षा अवधिसम्म सरकारले २ खर्ब १६ अर्ब २३ करोड ७७ लाख रुपैयाँ वित्तीय व्यवस्थापनमा खर्च गरेको छ । चालु आर्थिक वर्षमा सरकारले वित्तीय व्यवस्थापनमा ३ खर्ब ७५ अर्ब २४ करोड २० लाख रुपैयाँ खर्च गर्ने लक्ष्य राखेको थियो ।