नवलपरासी – गृहमन्त्री सुधन गुरुङले नारायणगढ–बुटवल सडक खण्ड विस्तारमा भइरहेको ढिलाइप्रति चिनियाँ ठेकेदार कम्पनीको ध्यानाकर्षण गराएका छन् । लामो समयदेखि सडक अलपत्र पर्दा नागरिकले सास्ती खेप्नुपरेको उल्लेख गर्दै उनले निर्माण कार्यलाई तीव्रता दिन निर्देशन दिएका हुन् ।

सडक खण्डको स्थलगत अनुगमनका लागि पुगेका गृहमन्त्री गुरुङले निर्माणको सुस्त गतिप्रति गम्भीर असन्तुष्टि व्यक्त गरे । “सडक अलपत्र हुँदा यात्रुले सास्ती पाएका छन्, दैनिक आवागमन प्रभावित भएको छ र दुर्घटनाको जोखिम पनि उत्तिकै बढेको छ,” उनले भने, “यो अवस्थालाई अब धेरै दिन लम्ब्याउन सकिँदैन । ठेकेदार कम्पनीले जिम्मेवार बनेर द्रुत गतिमा काम अघि बढाउनुपर्छ ।”

उनले निर्धारित समयमै गुणस्तरीय काम सम्पन्न गर्न सम्बन्धित निकाय र निर्माण कम्पनीलाई सचेत गराउँदै विकास निर्माणमा हुने ढिलासुस्ती सरकारलाई स्वीकार्य नहुने प्रस्ट पारे । नागरिकको सुरक्षा र सहज यात्रा पहिलो प्राथमिकता भएको भन्दै उनले कुनै पनि बहानामा लापरबाही नगर्न चेतावनी समेत दिएका छन् ।

गृहमन्त्रीको अनुगमन र निर्देशनपछि चिनियाँ ठेक्का कम्पनीका प्रतिनिधिहरूले अबको १५ दिनभित्र सडक निर्माणको मुख्य काम सम्पन्न गर्ने प्रतिबद्धता जनाएका छन् । उनीहरूले जनशक्ति र उपकरण थप गरेर निर्धारित समयमै काम सक्ने आश्वासन दिएका हुन् ।