काठमाडौं- त्रिभुवन विश्वविद्यालय शिक्षण अस्पतालमा उपचाररत पूर्वप्रधानमन्त्री तथा नेकपा एमालेका अध्यक्ष केपी शर्मा ओलीको पित्तथैलीको सफल शल्यक्रिया गरिएको छ।

अस्पतालले जारी गरेको स्वास्थ्य बुलेटिनअनुसार सोमबार ‘सिम्पोम्याटिक कोलेलिथियासिस’ समस्याका कारण ओलीको ‘ल्याप्रोस्कोपिक कोलेक्सिसटेक्टोमी’ विधिबाट शल्यक्रिया गरिएको हो।

शल्यक्रिया नेफ्रोलोजी विभागका प्रमुख प्रा.डा. दिव्या सिंह शाह र प्रा.डा. महेशराज सिग्देलको समन्वयमा जीआई सर्जरी विभागका प्रा.डा. पलेश्वा जोशी लाखे, सह प्रा.डा. विष्णु प्रसाद कडेल र डा. दीपक शर्मासहितको टोलीले गरेको थियो।

एनेस्थेसियोलोजी तर्फबाट डा. अमित शर्मा भट्टराई र डा. पंकज जोशी संलग्न थिए। शल्यक्रियापछि ओलीलाई निगरानीका लागि आईसीयूमा राखिएको अस्पतालले जनाएको छ।

आईसीयूमा सह प्रा.डा. प्रमेश सुन्दर श्रेष्ठ र डा. हेमराज पनेरुको टोलीले उपचार गरिरहेको छ । कार्डियोलोजी तर्फबाट प्रा.डा. चन्द्रमणि पौडेल र डा. सूर्य देवकोटा पनि उपचारमा संलग्न छन्। अस्पतालका अनुसार हाल ओलीको स्वास्थ्य अवस्था स्थिर रहेको छ।