काठमाडौं– चितवनको कालिका नगरपालिकाले अमेरिकाको भर्जिनियास्थित फेयरफ्याक्स सिटीसँग सहकार्यको प्रस्ताव गरेको छ। प्रस्तावअनुसार जिपिएस प्रणालीमार्फत घर नम्बर व्यवस्थापन, फोहर व्यवस्थापन, स्वास्थ्य, शिक्षा र पूर्वाधार विकासमा सहयोग गर्ने विषयमा छलफल हुनेछ।

हाल अमेरिका भ्रमणमा रहेका कालिका नगरपालिकाका प्रमुख विनोद रेग्मीले फेयरफ्याक्स सिटीकी मेयर क्याथरीन रिडसँग उक्त प्रस्ताव प्रस्तुत गरेका हुन् । सो क्रममा दुवै पालिकाबीच दिगो सम्बन्ध विस्तार गर्ने सहमति पनि भएको छ।

प्रमुख रेग्मीले भने, ‘कालिका नगरपालिकामा कार्यान्वयन भइरहेको घर नम्बर जिपिएस प्रणाली, फोहर व्यवस्थापन, स्वास्थ्य, शिक्षा र पूर्वाधार निर्माणका कार्यक्रमहरूमा सहकार्य गर्न प्रस्ताव गरेको छु। यस विषयमा सकारात्मक जवाफ प्राप्त भएको छ र निकट भविष्यमा सहकार्य हुने विश्वास लिएको छु।’

मेयर क्याथरीनले उपयुक्त समय मिलाएर टिमसँगै नेपाल भ्रमण गर्ने प्रतिबद्धता जनाउनुभएको छ। कार्यक्रमको सहजीकरण प्रा.डा रामहरि सुवेदीले गरेका थिए।