काठमाडौं– अमेरिकी राष्ट्रपति डोनाल्ड ट्रम्पले युद्धविरामपछि इरानको पुनर्निर्माणमा अमेरिका सहयोग गर्न तयार रहेको बताएका छन्।

ट्रम्पले आफ्नो सामाजिक सञ्जाल ट्रुथ सोसियलमार्फत प्रतिक्रिया दिँदै विश्व शान्तिका लागि यो ठूलो दिन भएको उल्लेख गरेका हुन्। उनले इरानसहित सबै पक्ष अब शान्ति चाहिरहेको बताएका छन्।

उनका अनुसार अमेरिका हर्मुजको जलडमरूमा देखिएको यातायात समस्याको समाधानका लागि पनि सहयोग गर्नेछ।

‘धेरै सकारात्मक कदमहरू चालिनेछन् र आर्थिक गतिविधि बढ्नेछ,’ उनले भने।

ट्रम्पले इरान अब पुनर्निर्माणतर्फ अघि बढ्न सक्ने उल्लेख गर्दै अमेरिका आवश्यक सामग्रीसहित सहयोगका लागि तयार रहने बताए। उनले मध्यपूर्वमा सुनौलो समय आउन सक्ने विश्वास व्यक्त गरे।