काठमाडौँ– नेपाली कांग्रेसका नेता दिलेन्द्रप्रसाद बडूले पार्टीको १५औँ महाधिवेशनबाट नयाँ पुस्तालाई नेतृत्व सुम्पिनुपर्ने बताएका छन् ।

बडूले आज सामाजिक सञ्जाल फेसबुकमार्फत एक विज्ञप्ति जारी गर्दै पार्टीको एकता र रुपान्तरणका लागि आगामी महाधिवेशनबाट नयाँ पुस्तालाई नेतृत्व दिनुपर्ने बताएका हुन् ।

उनले वर्तमान अवस्थामा पार्टीलाई थप बलियो, जिम्मेवार र एकतावद्ध बनाउने पक्षमा पहल गर्न पार्टीका नेता, कार्यकर्ता तथा शुभेच्छुकसँग आग्रह गरेका छन् ।

बडूले १४औँ महाधिवेशनको कार्यकाल गत मंसिरमै सकिए पनि नियमित महाधिवेशन हुन नसक्दा तत्कालीन नेतृत्वको असहमतिबीच विशेष महाधिवेशन भएको उल्लेख गरेका छन् ।

विशेष महाधिवेशनलाई निर्वाचन आयोगले वैधता दिएपछि त्यसलाई चुनौती दिँदै सर्वोच्च अदालतमा मुद्दा परेको उनले स्मरण गरेका छन् ।

उनले सर्वोच्च अदालतले पार्टीको आधिकारिकताका विषयमा गर्ने फैसला सबैले मान्नुपर्ने बताएका छन् । उनले निर्वाचनको कारण वा विशेष महाधिवेशन हुँदा नहुँदाको अवस्थाको काल्पनिक व्याख्यामा अलमलिएर समय खेर नफाल्न आग्रह समेत गरेका छन् ।

नेता बडूले गत फागुन २१ गते भएको प्रतिनिधिसभा सदस्य निर्वाचनमा पार्टीभित्रकै केही कमजोरी र मतदाताको परिवर्तनको चाहना अनुरूप निर्वाचन परिणाम अनुकूल नआएको तितो सत्यलाई स्वीकार गर्दै अघि बढ्नुको विकल्प नभएको बताएका छन् ।