काठमाडौं– ६९ औँ राष्ट्रिय सहकारी दिवस बिभिन्न कार्यक्रमको आयोजना गरी शुक्रबार मनाइएको छ ।

२०१३ साल चैत्र २० गते चितवनको शारदानगरमा बखान सहकारी स्थापना भएको दिनको स्मरणमा हरेक वर्ष राष्ट्रिय सहकारी दिवस मनाइने गरिन्छ । दिवसका अवसरमा भक्तपुरमा विभिन्न सहकारी संस्थाहरूले प्रभातफेरी कार्यक्रमको आयोजना गरेका छन् ।

उनीहरुले सहकारी एकता जिन्दावाद, छरिएको स्रोत एकत्रित गरौँ, स्थानीय वस्तुको सदुपयोग गरौँ, एकका लागि सबै, सवैका लागि एक, गैर सदस्यको निक्षेप स्वीकार नगरौँ लगायतका प्लेकार्ड प्रदर्शन गरेका थिए । यस वर्ष “उद्यमशीलता र पारदर्शिता: सहकारीको अपरिहार्यता” भन्ने मूल नारासहित दिवस मनाइएको हो ।

देशभर अहिले करिब ३० हजारको सङ्ख्यामा सहकारी रहेको तथ्याङ्क छ । कुल गार्हस्थ्य उत्पादनमा ३ प्रतिशत र वित्तीय पहुँचमा १५ प्रतिशत योगदान सहकारी क्षेत्रले गरेको बताइन्छ ।