धनगढी – नेपाली कांग्रेस सुदूरपश्चिम प्रदेश कार्यसमितिका महामन्त्री एवं पूर्व जिल्ला सभापति नरनारायण शाहले पार्टीका सबै जिम्मेवारीबाट अलग हुने घोषणा गरेका छन् । आठ दशक लामो पारिवारिक राजनीतिक विरासत बोकेका शाहले नेतृत्वको कार्यशैलीप्रति गम्भीर असन्तुष्टि पोख्दै अब उपरान्त पार्टीका कुनै पनि औपचारिक वा अनौपचारिक कार्यक्रममा सहभागी नहुने निर्णय गरेका हुन् ।

सामाजिक सञ्जालमार्फत आफ्नो धारणा सार्वजनिक गर्दै शाहले वर्तमान राजनीतिक परिस्थितिमा पार्टी नेतृत्वले खेलिरहेको भूमिकाप्रति आफू पूर्णतः असन्तुष्ट रहेको उल्लेख गरेका छन् । “मुलुकको संवेदनशील र चुनौतीपूर्ण परिस्थितिमा सिंगो कांग्रेस एकजुट भएर नउभिँदासम्म म पार्टीका गतिविधिमा सहभागी नहुने निर्णयमा पुगेको छु,” उनले भनेका छन्, “आगामी दिनमा म सम्भवतः दलगत राजनीतिभन्दा टाढै रहने प्रयास गर्नेछु ।”

शाहको परिवार तीन पुस्तादेखि कांग्रेसको राजनीतिमा सक्रिय छ । उनका हजुरबुबा लोकेन्द्र बहादुर शाह २०१५ सालका सांसद एवं पूर्व जिल्ला सभापति थिए भने बुबा मोहनबहादुर शाह पूर्व जिल्ला सभापति एवं जिविस सभापति थिए । स्वयं नरनारायणले दुई कार्यकाल जिल्ला सभापतिको जिम्मेवारीमा थिए ।

पार्टी विभाजनको खतराप्रति संकेत गर्दै उनले राष्ट्रियता, लोकतन्त्र र समाजवादप्रति आस्थावान कार्यकर्ताको भावनामा आघात पुग्ने चेतावनी समेत दिएका छन् । “स्थापित विरासतमाथि खेलवाड गर्ने प्रयत्न नगरियोस्,” उनले भनेका छन्, “अब उपरान्त म विशुद्ध नेपाली कांग्रेस भएर मात्र बाँच्न चाहन्छु, यसलाई अन्यथा नलिइदिनुहोला ।”

प्रतिनिधिसभा निर्वाचनको परिणामले आफू हतोत्साहित नभएको स्पष्ट पार्दै शाहले आफ्नो निर्णयलाई निर्वाचनको नतिजासँग मात्रै तुलना नगर्न समेत आग्रह गरेका छन् ।