काठमाडौं- बालेन्द्र शाह नेतृत्वको सरकारले व्यवसायी दीपक भट्टलाई अध्यागमनको कालोसूचीमा राखेको छ। यससँगै सरकारले उनको राहदानी पनि रोक्का गरिदिएको छ।

गत शुक्रबार राष्ट्रिय स्वतन्त्र पार्टीका वरिष्ठ नेता बालेन्द्रको नेतृत्वमा करिब दुईतिहाइ नजिकको शक्तिशाली सरकार बनेसँगै सम्पत्ति शुद्धीकरण कसुरमा कयौँमाथि छानबिन अघि बढेको छ।

सरकारले पूर्वप्रधानमन्त्री केपी शर्मा ओली, पुष्पकमल दाहाल प्रचण्ड, शेरबहादुर देउवा र माधवकुमार नेपालसहितमाथि सम्पत्ति शुद्धीकरण कसुरमा छानबिन थालेको छ।

त्यही छानबिनका क्रममा पहिलो चरणमा कम्तीमा पनि डेढ सयजनामाथि सरकारले सम्पत्ति शुद्धीकरण कसुर लगाउने तयारी गरेको छ। भट्टले अबदेखि विदेश जानुपरेमा सरकारको अनुमति लिनै पर्ने भएको छ।

यसरी सम्पत्ति शुद्धीकरण कसुरमा छानबिन अघि बढेपछि व्यवसायी भट्टलाई विदेश जान नपाउने गरी अध्यागन विभागले कालोसूचीमा राखेको हो । उनलाई सम्पत्ति शुद्धीकरण विभागको पत्र अनुसार सोमबारदेखि अध्यागमनले कालोसूचीमा राखेको पुष्टि गृहमन्त्री सुधन गुरुङको सचिवालयका एकजना सदस्यले मंगलबार गरेका छन् ।

व्यवसायी भट्टमाथि यसअघि सुशीला कार्की नेतृत्वको अन्तरिम सरकारले पनि छानबिन प्रयास गरेको थियो । तर त्ययसबेला उनीमाथिको छानबिन रोकिएको थियो । अहिले बालेन्द्रले सत्ता सम्हालेसँगै उनलाई विदेश जान नदिने गरी अध्यागमनको कालोसूचीमा राखिएको हो ।

यसअघि नेकपा एमालेका अध्यक्ष केपी शर्मा ओलीको नेतृत्वमा सरकार चल्दा भट्ट प्रभावशाली व्यक्तिका रुपमा थिए । त्यसबेला प्रधानमन्त्री ओली र सत्ता साझेदार नेपाली कांग्रेसका सभापति शेरबहादुर देउवासँग सिधै पहुँच राख्ने थोरै व्यक्तिमध्ये उनी पनि पर्थे ।