काठमाडौं– पूर्वमिस नेपाल तथा अभिनेत्री उषा खड्गीले पूर्वपति जीपी तिमल्सिनासँग २५ प्रतिशत हिस्सा मागेकी छन् । २०७९ जेठ २६ गते उषा र जीपीको सम्बन्ध विच्छेद भएको थियो ।

जीपीले सोही वर्ष मंसिर १९ मा दोस्रो विवाह गरेका थिए । सम्बन्ध विच्छेद भएको चार वर्षपछि उनीहरूको पारिवारिक विवाद पुनः सतहमा आएको छ । 

उनले मंगलबार दिउँसो एकपछि अर्को गरी विवादका कुरालाई सामाजिक सञ्जालबाट सार्वजनिक गरिरहेकी छन् । उषाले आफ्नो २५ प्रतिशत अंशको घर र छोराछोरीको हक अधिकारको माग गर्दै नयाँ सरकारसँग न्यायको अपेक्षा गरेकी छिन् । पूर्वपतिले आफूलाई दुःख दिएको भन्दै उनले फेसबुकमा लगातार स्टाटस लेखिरहेकी हुन् ।

उनको पहिलो स्टाटसमार्फत उनले लेखेकी छिन्, ‘एकल आमा र मलाई आफूमाथि गर्व छ ।’ त्यस्तै दोस्रो स्टाटसमा लेखेकी छिन्, ‘तिम्रो लोग्नेलाई सम्हाल्नुपर्‍यो । मलाई गाली गर्छ, मेरो जीवनमा हस्तक्षेप गर्दै छ । पुलिस प्रशासनमा शान्ति सुरक्षा नहाली भएन अब यो एक्स भनाउँदोलाई । अति गर्‍यो मलाई साथीहरू ।’

अर्कै स्टाटसमा लेखेकी छिन्, ‘आफू विवाह गरेर त्यही घरमा बच्चाहरूको अगाडि बस्ने लाज पचाएर अनि मलाई जथाभाबी भन्ने, मुख छाड्ने । कोही आउँदा जाँदा जथाभाबी बोल्ने । मेरो माइतीबाट परिवारका सदस्य, साथीहरू आउँदा नानाथरी भन्ने, डिस्टर्ब गर्ने धेरै भइसक्यो । अति भएर बोल्दै छु आज । 

अदालतले मलाई पनि यो घर अंशमा दिएको छ । त्यसले मेरो घर, मेरो घर भनेर मात्र भनेर तनाव दिने । मेरो अधिकार खोज्न म कता जाने ? यो देशमा नियम र कानुन छ कि छैन ? अधिकार सुरक्षा छ कि छैन ? नयाँ सरकारले मलाई पनि मेरो हक अधिकार न्याय दिनुपर्‍यो ।’

चौथोमा लेखेकी छिन्, ‘यो घरमा ४ अंशियार । मेरो २५ प्रतिशत । मेरो छोरी २५ प्रतिशत । छोराको २५ प्रतिशत । अनि त्यसको २५ प्रतिशत । अनि तिमल्सिनाले कसरी त्यसको मात्र घर भन्न मिल्छ ? त्यसपछि उनले थप लेखेकी छिन्, ‘मलाई यो घरबाट निस्की । निक्लेर जा । निक्ली है भनेर मलाई टर्चर दिन्छ । अब यो घरबाट म निस्कने होइन । तँलाई निकाल्ने हो । तिमीले सुरु गर्‍यौ । म अन्त्य गर्छु ।’

२०७९ जेठ २६ गते उषा र जीपी तिमल्सिनाबीच काठमाडौं जिल्ला अदालतमा सम्बन्ध विच्छेद भएको थियो । सम्बन्ध विच्छेदको ६ महिनापछि तिमल्सिनाले दोस्रो विवाह गरेका थिए । जतिबेला उनीहरूको अंशवण्डाको टुंगो लागेको थिएन ।