काठमाडौँ – संघीय संसद् सचिवालयले सर्वदलीय बैठक आह्वान गरेको छ । सरकारको सिफारिसमा राष्ट्रपतिबाट संसद् अधिवेशन आह्वान भए लगत्तै सचिवालयले सर्वदलीय बैठक बोलाएको हो।

फागुन २१ गते सम्पन्न प्रतिनिधिसभा निर्वाचनपछि बुधबार दिउँसो २ बजे प्रतिनिधिसभाको पहिलो बैठक बस्दैछ । सदन सुरु हुनु अगाडि सर्वदलीय बैठक बुधबार दिउँसो १ बजे बस्न लागेको हो ।

संघीय संसद् सचिवालयका प्रवक्ता एकराम गिरीका अनुसार सर्वदलीय बैठकमा संसद्‍मा प्रतिनिधित्व गर्ने सबै दलका प्रतिनिधि, सरकारका मन्त्री र सचिवालयका अधिकारी सहभागी हुनेछन् ।

बुधबार बस्न लागेको प्रतिनिधिसभाको पहिलो बैठकमा सभामुख निर्वाचनको प्रक्रिया अगाडि बढाउनेछ ।

राष्ट्रिय स्वतन्त्र पार्टी (रास्वपा) १८२ सिटसहित संसदमा सबैभन्दा ठुलो दल बनेको छ । संसदको पहिलो बैठकमा राजनीतिक दलका शीर्ष नेताले सम्बोधन गर्ने कार्यसूची समेत तय गरिएको छ ।