काठमाडौं- जिल्ला अदालत काठमाडौंले महेश बस्नेतलाई पक्राउ अनुमति माग गरिएको मिसिल फिर्ता गरेको छ। धादिङकी शोभा पाठकले पहिल्यै तामेलीमा राखिएको मुद्दामा पक्राउ अनुमति माग्दै जिल्ला प्रहरी परिसर काठमाडौं भद्रकालीमा निवेदन दर्ता गराएकी थिइन्।

जिल्ला सरकारी वकिलको कार्यालयका अनुसार न्यायाधीश ध्रुव कार्कीको इजलासमा मिसिल पेश हुँदा पक्राउ अनुमति दिन नमिल्ने आदेश भएको हो।

अदालतले एक पटक तामेली गरिसकेको मुद्दामा पुनः पक्राउ अनुमति दिन नमिल्ने उल्लेख गर्दै मिसिल फिर्ता गरेको जनाएको छ। अदालतको आदेशअनुसार, सो मुद्दामा पीडितले पुनः पूरक जाहेरी दिएको र उक्त विषयमा उच्च अदालत पाटनमा रिट निवेदन दर्ता भई हाल विचाराधीन अवस्थामा रहेको देखिएको छ।

एउटै विषय माथिल्लो अदालतमा विचाराधीन रहेको अवस्थामा जिल्ला अदालतबाट थप आदेश दिनु न्यायिक मान्यता र कानुनी व्यवस्था विपरीत हुने अदालतको ठहर छ।

अदालतले सक्कल मिसिल समेत उपलब्ध नभएको र मुद्दा उच्च अदालतमा विचाराधीन रहेकाले हाल निवेदन अनुसार पक्राउ अनुमति दिन नमिल्ने जनाएको छ। यससँगै महेश बस्नेतविरुद्ध पक्राउ अनुमति मागिएको प्रक्रिया तत्कालका लागि रोकिएको छ।