काठमाडौं- भौतिक पूर्वाधार तथा यातायात मन्त्री सुनील लम्सालले कुनै पनि आयोजनामा कर्मचारीले अतिरिक्त शुल्क (कमिशन) मागे आफूलाई जानकारी गराउन निर्माण व्यवसायीलाई आग्रह गरेका छन् ।

नेपाल निर्माण व्यवसायी महासंघले आइतबार सर्कुलर जारी गर्दै मन्त्रीसँग भएको छलफलपछि सदस्यहरूलाई अतिरिक्त रकम नदिन निर्देशन दिएको हो ।

अध्यक्ष रवि सिंह नेतृत्वको टोलीसँगको भेटमा पूर्वाधार विकासमा हुने अनियमितता र गुणस्तरीय काममा देखिने अवरोधबारे छलफल भएको थियो ।

निर्माण व्यवसायीहरूले काम सम्पन्न गरेपछि पनि भुक्तानी पाउन ढिलाइ हुने र बिल पास गराउन प्रतिशतका आधारमा कमिसन दिनुपर्ने दबाब रहेको गुनासो गरेका छन् ।

‘भुक्तानी प्रक्रियामै अनावश्यक झन्झट र अतिरिक्त रकम माग्ने प्रवृत्ति रहेको छ,’ व्यवसायीहरूले भनेका छन् ।

महासचिव रोशन दाहालद्वारा हस्ताक्षरित परिपत्रमा भनिएको छ, ‘अबका दिनमा निर्माणाधीन आयोजनासँग सम्बन्धित कुनै तहका सरकारी अधिकारीलाई अतिरिक्त शुल्क नदिन मन्त्रीज्यूबाट निर्देशन प्राप्त भएको छ ।’

मन्त्री लम्सालले ‘कसैले पनि कामको सिलसिलामा अतिरिक्त रकम मागे तुरुन्त जानकारी दिनू, कारबाही हुन्छ’ भन्दै काम समयमै सम्पन्न गर्न र गुणस्तरमा कुनै सम्झौता नहुने स्पष्ट पारेका छन् ।