काठमाडौं- नवनियुक्त अर्थमन्त्री डा. स्वर्णिम वाग्लेले पदभार सम्हालेसँगै देशको अर्थतन्त्रको शिथिलताप्रति चिन्ता व्यक्त गरेका छन् ।

सिंहदरबारस्थित अर्थ मन्त्रालय पुगेर पदभार ग्रहणका क्रममा उनले यस्तो बताएका हुन् । उनले पहिलो निर्णयस्वरूप देशको पछिल्लो आर्थिक अवस्था अध्ययन तथा विश्लेषण गर्न कार्यदल गठन गरेका छन्।

‘अहिले अर्थतन्त्रको जुन शिथिलता छ, केही सकारात्मक अवस्था छ, राजस्व चुनौतीपूर्ण अवस्थामा छ, बैङ्क डिपोजिट बढेको छ, आन्तरिक सिथिलता चिर्नु छ’, उनले भने, ‘नेपालको अर्थतन्त्र वृद्धि, रुपान्तरणकारी बजेटको तयारीमा अब हामी जुट्छौँ, अब टुक्रा टुक्रा काम गरेर भएन, प्रणालीगत समस्या धेरै छन, धेरै जेलिएका छन् । सिस्टम अधिक नियमनको बनायौँ, अर्थतन्त्र चलायमान बनाउन उत्प्रेरणासहितका समस्या सल्टाएर अगाडि जानू छ ।’

उनले अब धमाधम समस्याको समाधानमा जानुपर्ने बताएका छन् । ‘जनताले त्यो काम गर्ने हैसियत हामीलाई दिएका छन । यसमा हामी इमानदार प्रयास गर्ने छौँ’, उनले भने, ‘यो सिस्टम सुधारमा केही समय लाग्छ, धैर्यधारण गर्नुहोला, आजै बस्ने क्याबिनेटबाट पनि केही न केही महत्त्वपूर्ण निर्णय हुँदैछ ।’