काठमाडौं– नवनियुक्त युवा प्रधानमन्त्री बालेन्द्र शाह (बालेन) नेतृत्वको सरकारमा डा.विक्रम तिमल्सिना सञ्चारमन्त्री बनेका छन् । उनी नुवाकोट १ बाट निर्वाचित सांसद हुन । 

राष्ट्रिय स्वतन्त्र पार्टी (रास्वपा) बाट पहिलोपटक निर्वाचनमा होमिएका उनले नुवाकोट १  बाट २२ हजार ६०९ मतसहित सांसद बनेका हुन । 

उनका निकटतम प्रतिद्वन्द्वी विगतदेखि सोही क्षेत्रबाट निर्वाचित बन्दै आएका नेपाली कांग्रेसका डा. प्रकाशशरण महतले १८ हजार ५९७ मत ल्याएका थिए । 

नुवाकोटको पञ्चकन्या गाउँपालिका बानियाँटारमा जन्मिएका उनी सामान्य कृषि कर्ममा संलग्न परिवारमा हुर्किएका हुन् ।

गाउँकै इन्द्रायणी प्राथमिक विद्यालयबाट औपचारिक शिक्षा सुरु गरेका उनले चौघडास्थित क्षेत्रपाल माध्यमिक विद्यालयबाट एसएलसी उत्तीर्ण गरेका थिए । 

अष्ट्रेलियाको ग्रिफिथ विश्वविद्यालय र क्विन्सल्याण्ड विश्वविद्यालयमा अध्ययन गरेका डा.तिमिल्सिना शिक्षा र सञ्चारको क्षेत्रमा १५ वर्षदेखि क्रियाशील छन् ।

एक दशकअघि रेडियो सगरमाथाको कार्यक्रम उत्पादक तथा प्रस्तोता थिए । अध्ययनका लागि अष्ट्रेलिया गएपछि उनले त्यहीँबाट सञ्चालित ‘नेपाल एक्सप्रेस’ नामक कार्यक्रमका कार्यकारी सम्पादक र सिड्नीबाट सञ्चालित साउथ एसिया डटकम डट एयूको सम्पादकीय सल्लाहकार थिए ।

त्यसपछि देश र राष्ट्रको समुन्नतिको लागि नेपाल फर्किएका उनी सबै समुदायको साझा आवाज बन्ने उनले निर्वाचन अघि सामाजिक सञ्जालमा राखेको भिडियो सामाग्रीमा भनेका छन् ।