काठमाडौं– अमेरिकी राष्ट्रपति डोनाल्ड ट्रम्पको अभिव्यक्तिपछि अमेरिका र इरानबीच वार्ता हुन लागेको चर्चा चुलिएको अवस्थामा पाकिस्तानस्थित इरानी राजदूत रेजा अमिरी मुघदमले त्यसबारे स्पष्ट प्रतिक्रिया दिएका छन्।

 अन्तराष्ट्रिय मिडियाहरूले इस्लामिक रिपब्लिक न्यूज एजेन्सीलाई उद्धृत गर्दै राजदूत मुघदमले अमेरिका र इरानबीच हालसम्म कुनै प्रत्यक्ष वार्ता नभएको बताएका छन्। 

उनले भने, ‘अन्य देशहरूले गरिरहेका मैत्रीपूर्ण पहललाई अमेरिका–इरानबीच वार्ता भइरहेको रूपमा बुझ्नु हुँदैन। ती प्रयासहरू केवल तेहरान र वाशिङ्टनबीच सम्भावित संवादका लागि वातावरण बनाउन केन्द्रित छन्, जसले युद्ध अन्त्य गर्न सहयोग पुग्ने अपेक्षा गरिएको छ।’

यसैबीच, समाचार संस्था एपीका अनुसार इरानले अमेरिकाबाट १५ बुँदे प्रस्ताव प्राप्त गरेको छ। उक्त प्रस्तावको उद्देश्य इरान र अमेरिका–इजरायलबीच जारी तनावलाई युद्धविरामतर्फ लैजानु रहेको बताइएको छ। यो जानकारी दुई पाकिस्तानी अधिकारीलाई उद्धृत गर्दै सार्वजनिक गरिएको हो।

यसअघि पाकिस्तानका प्रधानमन्त्री शाहबाज शरीफले अमेरिका र इरानबीच मध्यस्थता गर्न इच्छुक रहेको बताएका थिए। उनले सामाजिक सञ्जालमार्फत अमेरिका र इरान सहमत भए पाकिस्तान वार्ताको आयोजना गर्न तयार रहेको उल्लेख गरेका छन्।