काठमाडौं– गत भदौमा भएको जेन-जी आन्दोलनको अध्ययन गर्न बनेको गौरीबहादुर कार्की नेतृत्वको उच्चस्तरीय आयोगले भदौ २३ गते बानेश्वरमा भएको घटनाको प्रमाण सुरक्षित नभएको उल्लेख गरेको छ ।

खबरहबमा प्राप्त आयोगको प्रतिवेदनमा भदौ २३ गते बानेश्वर क्षेत्रमा सुरक्षा निकायले घातक बल प्रयोग गरेको तर, प्रयोग भएका गोला बारुदको खोका सुरक्षित नरहेको उल्लेख गरिएको छ ।

‘भाद्र २३ गते बानेश्वर क्षेत्रमा भएको प्रदर्शनकारी र सुरक्षा बल बिच भएको भिडन्तमा सुरक्षा निकायबाट घातक बल पनि प्रयोग भएको थियो । घटनापछि प्रमाणको रूपमा त्यहाँ प्रयोग भएका गोला बारुदको खोका समेतको सुरक्षित रेकर्ड राख्नु पर्दथ्यो । तर राखिएको देखिँदैन’, प्रतिवेदनमा उल्लेख छ ।

सो रेकर्ड नहुनुमा २३ गते साँझसम्म बानेश्वर क्षेत्रमा तनावको स्थिति कायम रहेको र २४ गते बिहान संकलन गर्नुपर्नेमा अवस्था नियन्त्रण गर्नु प्राथमिकता रहेको हुनसक्ने आयोगको प्रतिवेदनमा उल्लेख छ । साथै, सबुद प्रमाण संरक्षण गर्दा प्रहरीले आफूविरुद्ध प्रमाण लाग्ने डरले पनि वास्ता नगरेको हुनसक्ने प्रतिवेदनमा उल्लेख छ ।