काठमाडौं– राष्ट्रिय स्वतन्त्र पार्टी (रास्वपा)का सभापति रवि लामिछानेले नख्खु कारागारबाट निस्कने क्रममा आफूलाई दिइएको पत्र तयार पार्ने क्रममा आफ्नो सहभागिता नभएको बयान दिएको खुलेको छ । 

उनले जेन-जी आन्दोलनसम्बन्धी अध्ययन गर्न बनेको उच्चस्तरीय छानबिन आयोगसमक्ष दिएको बयानमा कारागारबाट प्राप्त पत्रमा हस्ताक्षर गर्ने र लेखन गर्ने प्रक्रियामा आफ्नो सहभागिता नभएको बताएका हुन् ।

‘कारागार प्रशासनले मलाई औपचारिक रूपमा थुनामुक्त गर्ने पत्र दिने तयारी गरेको रहेछ, तर पत्र तयार नहुँदै भिडले मलाई कारागार बाहिर लगे’, उनले भनेका छन्, ‘पछि मैले कारागारबाट पत्र आएको जानकारी पाएँ, तर त्यसमा हस्ताक्षर गर्ने वा लेखन पक्रियामा मेरो कुनै सहभागिता थिएन, त्यसैले सो पत्रको सम्बन्धमा जेल प्रशासन स्वयं जबाफदेही हुनुपर्छ भन्ने मेरो धारणा हो ।’

तर, लामिछाने जेलबाट बाहिरिएको केही दिनमा नै नख्खु कारागारले सूचना निकालेर सभापति लामिछानेलाई आत्मसमर्पण गर्न भनेको थियो ।