काठमाडौं – नेपाल जेनजी फ्रन्टकी संयोजक रक्षा बमले आफूमाथि उठेका आरोपबारे सामाजिक सञ्जालमार्फत स्पष्टीकरण दिएकी छन् ।

केही दिनअघि काठमाडौँको माइतीघरमा आफूमाथि आफ्नै उमेर समूहका घाइते आन्दोलनकारीहरूले प्रश्न उठाएको भिडियो सार्वजनिक भएपछि उनले उक्त प्रतिक्रिया दिएकी हुन् ।

बमले आफूविरुद्ध लगाइएका अधिकांश आरोप निराधार रहेको बताउँदै ‘प्रधानमन्त्री र गृहमन्त्रीसँग पहुँच हुँदाहुँदै पनि किन सडकमा ?’ भन्ने प्रश्न भने स्वाभाविक भएको उल्लेख गरेकी छन् ।

उनले आन्दोलनका मुद्दा संस्थागत गर्न तथा चुनाव सुनिश्चित गराउनका लागि सम्बन्धित पक्षसँग भेटघाट भएको भए पनि आफूले कहिल्यै व्यक्तिगत स्वार्थका कुरा नगरेको दाबी गरेकी छन् । पटक–पटक संवाद र आग्रह गर्दा पनि राज्य गम्भीर नदेखिएपछि सडक संघर्ष रोज्न बाध्य भएको उनको भनाइ छ ।

बमले आन्दोलनका घाइते र पीडितहरूको आक्रोशलाई स्वाभाविक र न्यायोचित मान्दै उनीहरूको क्षतिपूर्ति, सेवा–सुविधा र न्यायका लागि आफू सधैँ साथमा रहने प्रतिबद्धता जनाएकी छन् । तर लोकतन्त्रको विपक्षमा उभिनेहरूसँग भने आफू सहमत हुन नसक्ने स्पष्ट अडान पनि उनले व्यक्त गरेकी छन् ।

उनले धम्की, दुर्व्यवहार र चरित्रहत्या गर्ने गतिविधिले आन्दोलन कमजोर हुने चेतावनी दिँदै आलोचना र प्रश्नको सामना गर्न आफू तयार रहेको बताएकी छन् । ‘म प्रश्नभन्दा माथि छैन,’ भन्दै उनले सभ्य र जिम्मेवार ढंगले प्रश्न उठाउन आग्रह गरेकी छन् ।