काठमाडौं– नेकपा मसालले प्रतिनिधिसभाको निर्वाचनपछि नेपालका कम्युनिष्टहरुको भूमिकाबारे गम्भीर प्रश्न उठेको जनाएको छ । 

हालैसम्पन्न केन्द्रीय समितिको पूर्ण बैठकबारे जानकारी दिन आइतबार बुटवलमा आयोजित पत्रकार सम्मेलनमा नेकपा मसालका महामन्त्री मोहन विक्रम सिंहले कम्युनिष्ट नेताहरूको आचरणका कारण जनतामा निराशा र असन्तोष पैदा भएको निर्वाचनबाट पुष्टि भएकाले नेपालका कम्युनिष्टहरुको भूमिकाबारे गम्भीर प्रश्न उठेको बताएका हुन् ।

कम्युनिस्टहरूले सही राजनीतिक दर्शन अनुसार काम गर्न नसकेकाले कम्युनिस्टको मूलधार भनिनेहरूको पतन भएको उनको भनाइ छ । उनले अहिले नेपालमा आफूलाई मूलधार भनिनेहरू वास्तविक कम्युनिष्ट नभएको समेत तर्क गरे । त्यस्तै महामन्त्री सिंहले राजनीतिमा उमेरले कुनै अर्थ नराख्ने समेत बताए । उमेर भन्दा पनि सही दृष्टिकोण महत्त्वपूर्ण हुने उनको भनाइ छ ।

उनले युवा नेताका रुपमा परिचित रास्वपा सभापति रवि लामिछानेले गृहमन्त्री हुँदा अरबौ घोटाला गरेको आरोप समेत लगाए ।  

त्यस्तै नेकपा मसालले भदौ २३ र २४ गते भएको युवाहरूको आन्दोलन जायज मागका लागि भए पनि स्पष्ट नेतृत्व हुन नसक्दा अवसरवादीहरूले त्यसलाई गलत रुपमा प्रयोग गरेको जनाएको छ । 

मसालले वर्तमान राजनीतिक अवस्थालाई गम्भीर चुनौतीका रूपमा प्रस्तुत गर्दै राष्ट्रिय स्वाधीनता, पारदर्शिता र जनताको हितअनुसार राजनीति सञ्चालन गर्नुपर्ने आवश्यकता औँल्याएको छ भने हिंसात्मक घटनाको निष्पक्ष छानबिन, दोषीमाथि कारबाही र बाह्य प्रभावबाट मुक्त राष्ट्रिय नीति अवलम्बन गर्न सबै पक्ष एकताबद्ध हुनुपर्नेमा जोड दिएको छ ।