काठमाडौं- नेपाली कांग्रेसका नेता अर्जुननरसिंह केसीले संघीय संसद्को प्रतिनिधिसभातर्फ संसदीय दलको नेतामा आफ्नो दाबी प्रस्तुत गरेका छन् ।

शुक्रबार ललितपुरको सानेपामा सुरू केन्द्रीय कार्यसमिति बैठकमा सहभागी हुन पुगेका उनले दलको नेतामा आफ्नो दाबी स्वाभाविक रहेको उल्लेख गरे ।

कांग्रेस सभापतिबाट राजीनामा दिएका नेता गगन थापाका ससुरासमेत रहेका उनले वरिष्ठताका आधारमा आफूले उक्त पदका लागि स्वतः दाबी गर्ने अवस्था रहेको बताए ।

लामो संसदीय अनुभव र योगदानका कारण दलको नेतामा दाबी प्रस्तुत गर्नु स्वाभाविक प्रक्रिया रहेको पनि केसीले बताए ।

केसीले विगतका संसदीय अभ्यासमा आफ्नो सक्रिय सहभागिता रहेको दाबी गरे । २०४७ सालपछि कांग्रेसको संसदीय यात्रामा आफ्नो महत्त्वपूर्ण भूमिका रहेको पनि उनले जिकिर गरे।

यस पटक समानुपातिकबाट संसद्मा प्रवेश गरेका ७७ वर्षीय केसीले आफू पार्टीभित्रको अनुभवी नेतामध्ये पर्ने बताए । उनले दलको नेतामा दाबी गर्नु उचित हुने पनि जिकिर गरे ।