एजेन्सी– कोमोरोसको समुद्री तट नजिकै डुङ्गा दुर्घटना हुँदा कम्तीमा १७ आप्रवासीको मृत्यु भएको छ। गृहमन्त्री मोहम्मद अहमद असौमानीले बिहीबार उक्त जानकारी दिए।

उनका अनुसार डुङ्गामा सवार ५१ जनामध्ये ३० जनालाई जीवितै उद्धार गरिएको छ। बुधबार राति आठ जनाको शव समुद्रबाट निकालिएको थियो भने बिहीबार बिहान थप नौ जनाको शव फेला परेको छ। अझै चार जना बेपत्ता रहेको जनाइएको छ।

दुर्घटनामा बाँचेका घाइतेहरूलाई उपचारका लागि अस्पताल भर्ना गरिएको छ। सामुद्रिक सुरक्षा निकायले हराइरहेकाहरूको खोजी कार्य जारी राखेको छ।

प्रारम्भिक जानकारी अनुसार उद्धार गरिएका आप्रवासीहरू प्रजातान्त्रिक गणतन्त्र कङ्गोका हुन सक्ने अनुमान गरिएको छ, तर उनीहरूको पहिचान खुलाउन प्रक्रिया जारी छ। उनीहरू मायोटतर्फ जाँदै थिए।

अधिकारीहरूका अनुसार कोमोरोसमा आप्रवासीसँग सम्बन्धित यति ठूलो मानवीय क्षतिको घटना पहिलो पटक भएको हो।