काठमाडौं- राष्ट्रिय स्वतन्त्र पार्टीका चार शीर्ष नेताले सरकार गठनबारे आन्तरिक तयारी र छलफल थालेका छन् ।

निर्वाचन आयोगले समानुपातिक सांसदलाई प्रमाणपत्र दिएर फागुन २१ को चुनावको प्रतिवेदनसमेत राष्ट्रपतिकहाँ बुझाएपछि रास्वपाले आगामी चैत १४ गते गठन गर्ने गरी नयाँ सरकारको तयारी थालेको हो ।

नयाँ सरकारका लागि आन्तरिक तयारी थालिएको जानकारी बिहीबार साँझ रास्वपा उपसभापति डा. स्वर्णिम वाग्लेले दिएका छन् ।

संसद् सचिवालयले आगामी चैत १२ गते सबै सांसदको शपथ खुवाउने कार्यक्रम राखेको छ । त्यसको दुई दिनपछि अर्थात् चैत १४ गते रास्वपा वरिष्ठ नेता बालेन्द्र साहले प्रधानमन्त्रीमा नियुक्ति लिने तयारी गरेका छन् ।

त्यसअघि रास्वपाले आफ्नो विधान संशोधन गरेर बालेन्द्रलाई दलको नेता बनाउनुपर्नेछ । दलको नेता चयनका लागि विधान संशोधन गर्न यही शनिबार रास्वपाको बैठक बस्ने तयारी छ।