तेहरान- इरानमा गत जनवरीमा भएको सरकारविरुद्धको प्रदर्शनका क्रममा प्रहरीको हत्या गरेको आरोपमा ३ जनालाई फाँसी दिइएको छ।

समाचारअनुसार उनीहरूलाई दुईजना प्रहरी अधिकारीको हत्या गरेको घटनामा दोषी ठहर गरिएको थियो। अल जजिराले इरानी सञ्चारमाध्यमलाई उद्धृत गर्दै यो जानकारी दिएको हो।

यस वर्षको सुरुवातमा इरानभर ठूला विरोध प्रदर्शन भएका थिए, जसमा व्यापक हिंसा पनि भएको थियो। रिपोर्टअनुसार ती प्रदर्शनका क्रममा करिब ३ हजार ११७ जनाको मृत्यु भएको थियो ।

तर ह्यूमन राइट्स एक्टिविस्ट्स न्यूज एजेन्सीका अनुसार मारिनेको वास्तविक संख्या अझ धेरै हुन सक्छ। उनीहरूका अनुसार हालसम्म ६ हजार ८५४ जनाको मृत्यु पुष्टि भइसकेको छ । ११ हजार २८० भन्दा बढी घटनाको अनुसन्धान अझै जारी छ।

लेबनानमा इजरायली आक्रमण, दुई दिनमा ४५ जनाको मृत्यु

उता लेबनानमा पछिल्ला दुई दिनमा इजरायलले गरेको आक्रमणमा ४५ जनाको मृत्यु भएको छ। त्यहाँको स्वास्थ्य मन्त्रालयले यो जानकारी दिएको हो।

राजधानी बेरूतमा सबैभन्दा बढी क्षति भएको छ। यहाँ ११ जनाको मृत्यु भएको छ भने ४५ जना घाइते भएका छन्, जसमा १४ जना बालबालिका रहेका छन्। देशका अन्य विभिन्न क्षेत्रमा इजरायलले अन्धाधुन्ध आक्रमण गर्दा थप जनधनको क्षति भएको छ।