काठमाडौँ – अष्ट्रेलिया सरकारले इन्धन अभाव चुलिएपछि आफ्नो आपतकालीन इन्धन भण्डारबाट पेट्रोल र डिजेल बजारमा पठाउन थालेको छ ।

यो निर्णयसँगै कुल ७६ करोड २० लाख (७६२ मिलियन) लिटर पेट्रोल र डिजेलको अतिरिक्त आपूर्ति उपभोक्तासम्म पुग्न थालेको छ।

पछिल्लो हप्ता विश्वभर जस्तै अष्ट्रेलियामा पनि इन्धनको मूल्य आकासिएपछि इन्धन नपाइने त्रासमा उपभोक्ताको लाइन बढेपछि सरकारले यस्तो निर्णय गरेको हो ।

अस्ट्रेलियाको यो कदमले मूल्य वृद्धिलाई केही कम गर्ने अपेक्षा गरिएको छ। अष्ट्रेलियाली प्रतिस्पर्धा र उपभोक्ता आयोगका अनुसार, फेब्रुअरी २० देखि मार्च ११ को बीचमा अष्ट्रेलियाका पाँच ठूला सहरमा पेट्रोलको मूल्य प्रति लिटर झण्डै ५० सेन्टले बढेको छ।

हाल त्यहाँ औसत मूल्य प्रति लिटर २.२० अष्ट्रेलियन डलर पुगेको छ। न्यु साउथ वेल्स राज्यका तीन हजार पेट्रोल स्टेशनमध्ये ३२ वटामा इन्धन अभाव भएको वा रित्तिएको अधिकारीले बताएका छन्।

त्यहाँको सरकारले आवश्यकता अनुसार मात्र इन्धन किन्न आग्रह गरे तापनि, पेट्रोल स्टेशनमा मानिसको लामो लाइन लागेको छ। धेरैले इन्धन सञ्चय गरिरहेका छन्।

त्यहाँका इन्धन मन्त्रीले धेरै सञ्चयन नगर्न तर आवश्यकता अनुसार उपयोग गर्न अनुरोध गरेका छन्। इरानमा भएको बमबारीपछि इन्धनको माग दोब्बर भएकोले अनावश्यक सञ्चय नगर्न आधिकारिक निकायले अनुरोध गरेको हो ।

इरान र इजरायल–अमेरिकाबीच चर्किएको युद्धले इन्धन संकट विश्वव्यापी समस्या बनेको छ । अष्ट्रेलिया आफ्नो इन्धन आपूर्तिको ठूलो हिस्सा आयातमा निर्भर रहने हुनाले यसको प्रत्यक्ष असर परेको हो।