दुबई – यूएईले इरानसँग बढ्दो सैन्य तनावबीच सामाजिक सञ्जालमा आक्रमणसम्बन्धी भिडियो प्रसारण गर्नेहरू विरुद्ध कडा कारबाही थालेको छ।

इरानी आक्रमणसम्बन्धी भिडियो सामाजिक सञ्जालमा शेयर गरेको आरोपमा तीन नेपालीसहित आप्रवासी कामदारहरू संयुक्त अरब इमिरेट्स (यूएई)मा पक्राउ परेका छन्।

यस क्रममा विभिन्न देशका नागरिकसँगै तीन नेपाली पनि पक्राउ परेका त्यहाँ महान्यायाधिवक्ता कार्यालयले जनाएको छ। पक्राउ पर्ने नेपालीको नाम गल्फ न्युजले छोटकरीमा खुलाएको छ । पहिलो नेपालीको परिचय एम.एम.का रूपमा दिइएको छ। त्यस्तै दोस्रो नेपालीको नाम पी।एस राखिएको छ । पक्राउ परेका तेस्रो नेपालीको नाम एच.ए. रहेको छ ।

अधिकारीहरूका अनुसार ती व्यक्तिहरूले मिसाइल तथा ड्रोन आक्रमणसँग सम्बन्धित भिडियो, विस्फोटका दृश्य र सुरक्षा प्रणालीले आक्रमण रोकिरहेको फुटेज अनलाइनमा पोस्ट गरेका थिए। कतिपय भिडियो वास्तविक भए पनि केही सामग्री भ्रामक वा कृत्रिम रूपमा तयार गरिएको भएको बताइएको छ।

यूएई अभियोजक कार्यालयले यस्तो सामग्री सार्वजनिक सुरक्षा, स्थिरता र राष्ट्रिय सुरक्षामा असर पार्ने भन्दै कारबाही गरेको जनाएको छ। आरोपितहरूले आक्रमण रोकिएको दृश्य, जमिनमा खसेका प्रक्षेपास्त्रका टुक्रा र घटनास्थल आसपासका भीडका भिडियो समेत प्रसारण गरेको अनुसन्धानमा खुलासा भएको छ।

यसअघि पनि यूएईले इरानी आक्रमणसँग सम्बन्धित भिडियो वा तस्बिर शेयर गर्ने विदेशी नागरिकहरूलाई पक्राउ गर्दै आएको छ। यस्तो सामग्री फैलाएमा कम्तीमा एक वर्ष कैद र ठूलो जरिवाना हुन सक्ने चेतावनी दिइएको छ। क्षेत्रीय तनाव तीव्र भइरहेका बेला सरकारले आधिकारिक स्रोत बाहेकका जानकारी नफैलाउन सर्वसाधारणलाई आग्रह गरेको छ।